الماتىدا ماس كۇيىندە جول ەرەجەسىن بۇزىپ، قاشىپ كەتكەن كۇدىكتى پولشادا ۇستالدى

استانا. KAZINFORM - بۇگىن قازاقستان رەسپۋبليكاسى باس پروكۋراتۋراسىنىڭ جانە ىشكى ىستەر مينيسترلىگىنىڭ ينتەرپول قىزمەتكەرلەرى قازاقستان رەسپۋبليكاسىنىڭ پولشا رەسپۋبليكاسىنداعى ەلشىلىگىنىڭ كومەگىمەن الكوگولدىك ماساڭ كۇيدە جول قوزعالىسى ەرەجەلەرىن بۇزعانى ءۇشىن قىلمىستىق جاۋاپكەرشىلىككە تارتۋ ماقساتىندا پولشادان گرۋزيا ازاماتىن ەكستراديسيالادى.

كۇدىكتى 2023 -جىلى الماتى قالاسىندا الكوگولدىك ماساڭ كۇيدە كولىك جۇرگىزىپ كەلە جاتىپ، قارسى جولاققا شىعىپ كەتكەن، ناتيجەسىندە باسقا كولىكپەن سوقتىعىسىپ، جۇرگىزۋشىنىڭ دەنساۋلىعىنا اۋىر زيان كەلتىردى.

«قىلمىس جاساعاننان كەيىن كۇدىكتى جاسىرىنىپ، حالىقارالىق ىزدەۋگە جاريالانعان. اعىمداعى جىلدىڭ ءساۋىر ايىندا ول پولشادا ۇستالدى.

قازاقستان رەسپۋبليكاسى باس پروكۋراتۋراسىنىڭ سۇراۋى بويىنشا كۇدىكتى قازاقستانعا ەكستراديتسيالانىپ، قازىر تەرگەۋ يزولياتورىنا قامالدى.

ايىپتالىپ وتىرعان قىلمىسى ءۇشىن ون جىل مەرزىمگە بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ايىرا وتىرىپ، ءۇش جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا كوزدەلگەن»، - دەپ جازدى باقىلاۋشى ورگاننان.

ايتا كەتۋ كەرەك، پولشا رەسپۋبليكاسىمەن ەكستراديتسيالاۋ تۋرالى كەلىسىمنىڭ جوقتىعىنا قاراماستان، كۇدىكتىنى ەكستراديتسيالاۋ قازاقستاننىڭ باس پروكۋراتۋراسى مەن پولشا ادىلەت مينيسترلىگىنىڭ اراسىنداعى تىعىز ىنتىماقتاستىقتىڭ ارقاسىندا مۇمكىن بولدى.

سونىمەن قاتار اعىمداعى جىلى پولشا تاراپىنان قازاقستان اۋماعىندا اسا ءىرى كولەمدە ەسىرتكى بيزنەسىمەن اينالىسقان ترانسۇلتتىق ۇيىمداسقان توپتىڭ ۇيىمداستىرۋشىسى قازاقستانعا ەكستراديتسيالاندى.

اۆتور

اسحات رايقۇل