قالالىق موبيلدىلىك باسقارماسىنا قاراستى Almaty parking مەكەمەسىنىڭ مالىمەتىنشە، مەگاپوليستە بۇگىنگى كۇنى تروتۋار تۇرىندەگى 12 مىڭ ورىن، الاڭ تۇرىندەگى 6 مىڭ ورىن اۆتوتۇراق بار. قالا بويىنشا تۇراقتاردىڭ باعاسى - ساعاتىنا 100 تەڭگە. تەك جاسىل بازار اۋماعىنىڭ جانىندا 150 ت گ/ساعات قۇنى قويىلعان.
اۋدان بويىنشا اۆتوتۇراق سانى ەڭ كوپ اۋدان - المالى، مۇندا التى مىڭعا جۋىق تۇراق ورنالاسقان. ال اۆتوتۇراق ەڭ از ورنالاسقان اۋدان - ناۋرىزباي اۋدانى، مۇندا 75 ورىن بار.
Kazinform ساۋالىنا جاۋاپ بەرگەن Almaty parking مەكەمەسى الماتىعا الداعى ۋاقىتتا تۇراقتار سانى كوپقاباتتى اۆتوتۇراق ەسەبىنەن كوبەيەتىنىن مالىمدەدى.
- قالالىق كەڭىستىكتى ءتيىمدى پايدالانۋ، كولىك ينفراقۇرىلىمىن جاقسارتۋ جانە اۆتوتۇراق ورىندارىنىڭ تاپشىلىعى ماسەلەلەرىن شەشۋ ماقساتىندا «الماتى پاركينگ» كمك مەدەۋ اۋدانى اكىمى اپپاراتىمەن جانە الماتى قالاسىنىڭ قالالىق موبيلدىلىك باسقارماسىمەن بىرگە «سامال-1» شاعىن اۋدانىندا جەر ۋچاسكەسىن تاڭدادى. بۇل جەر ۋچاسكەسى كوپقاباتتى مەحانيزاتسيالانعان اۆتوتۇراقتاردى سالۋ ءۇشىن جوبالىق-سمەتالىق قۇجاتتاما ازىرلەۋگە بەرىلدى. جۇمىس جوباسىنا سايكەس، اۋلالىق اۋماقتاردىڭ جۇكتەمەسىن بوساتۋ ءۇشىن 48 كولىككە ارنالعان مەحانيزاتسيالانعان اۆتوتۇراق ۇيىمداستىرۋ جوسپارلانىپ وتىر، - دەپ حابارلادى مەكەمەدەن.
ودان بولەك Almaty parking جاۋابىنا سايكەس، الماتى قالاسىنىڭ قۇرىلىس باسقارماسى قازىرگى ۋاقىتتا «كوكتەم-3» شاعىن اۋدانىندا (بوستاندىق اۋدانى) كوپقاباتتى اۆتوتۇراقتى سالۋعا ارنالعان جوبالىق-سمەتالىق قۇجاتتامانى ازىرلەۋ جۇمىستارىن اياقتاپ جاتىر. بۇل اۆتوتۇراق 207 كولىك ورنىنا ارنالعان العاشقى كوممۋنالدىق اۆتوتۇراق بولماق.
ەسكە سالايىق، بۇعان دەيىن الماتىدا 16 جىلداي قۇرىلىسى توقتاپ تۇرعان كوپقاباتتى اۆتوتۇراق سۇرىلگەنىن جازعانبىز.