الماتىدا كوشەلەردى ۇزارتۋ ءۇشىن جەر ۋچاسكەلەرى ساتىپ الىنادى

قونايەۆ. قازاقپارات - 2025 -جىلى الماتى اكىمدىگى بىرنەشە كوشەنى ۇزارتۋ ءۇشىن جەر تەلىمدەرىن ساتىپ الۋدى اياقتايدى.

ناۋرىزباي اۋدانىنىڭ تۇرعىندارىمەن كەزدەسۋ بارىسىندا الماتى اكىمى ەربولات دوسايەۆ اۋداندا جول-كولىك ينفراقۇرىلىمىن دامىتۋ جانە جولاۋشىلار تاسىمالىنىڭ ساپاسىن ارتتىرۋ جونىندەگى جۇمىستارعا توقتالدى.

ايتۋىنشا، بيىل اۋداننىڭ 110 كوشەسىندەگى 50 مىڭ شارشى مەتر جول اعىمداعى جوندەۋمەن قامتىلعان. قاراشا ايىنىڭ سوڭىنا دەيىن 150 كوشەدە تاعى 20 مىڭ شارشى مەتر جولدى جوندەۋ جوسپاردا.

«قازىر 8 كوشەدە 5 ك م جولعا ورتاشا جوندەۋ جۇرگىزىلدى، قاراشا ايىنىڭ سوڭىنا دەيىن ۇزىندىعى 13 ك م بولاتىن تاعى 22 كوشە ورتاشا جوندەۋمەن قامتىلادى، قازان ايىنىڭ سوڭىندا اقجار شاعىن اۋدانىنداعى 6 كوشە بويىنشا 2 ك م جول قۇرىلىسىن اياقتاۋ كوزدەلگەن»، - دەدى ەربولات دوسايەۆ.

قالا باسشىسىنىڭ ءسوزىنشى، اۋداندا ماگيسترالدىق كوشەلەردى ۇزارتۋ جۇمىستارى جالعاسىپ جاتىر. قاراشا ايىنىڭ سوڭىنا دەيىن اباي داڭعىلىن سترويتەلنايا كوشەسىنەن قالا شەكاراسىنا دەيىن ۇزارتۋدى اياقتالادى. تولە بي كوشەسىن ۇزارتۋ ءۇشىن قاجەتتى 270 جەر ۋچاسكەنىڭ، 170 تەلىمى ساتىپ الىندى، قالعان ۋچاسكەلەردى ساتىپ الۋدى جىل سوڭىنا دەيىن اياقتاۋ جوسپاردا. جۇبانوۆ كوشەسىن ۇزارتۋ ءۇشىن 346 جەر ۋچاسكەسى الىناتىن بولادى. 148 نىسان بويىنشا قاۋلىلار قابىلداندى، ۋچاسكەلەردى ساتىپ الۋ 2025 -جىلدىڭ سوڭىنا دەيىن جالعاسادى.

سونداي-اق جىل باسىنان بەرى 150 اۆتوبۋس جاڭارتىلدى. تۇرعىنداردىڭ جايلىلىعى ءۇشىن 12 جاڭا ايالداما پاۆيلونى ورناتىلدى، ال جىل سوڭىنا دەيىن بۇرىن بولماعان تاعى 5 ايالداما ورناتىلادى.

اۆتور

الما مۇقانوۆا