الماتىدا جۇرەگى اۋراتىن ناۋقاستارعا سمارتفون ارقىلى قاشىقتان باسقارىلاتىن دەفيبريللياتورلار ورناتىلدى

كارديولوگيا جانە ىشكى اۋرۋلار عىلىمي زەرتتەۋ ينستيتۋتىندا پاتسيەنتتەرگە قاشىقتان مونيتورينگ جۇيەسىنە قوسۋ مۇمكىندىگىمەن جاڭا بۋىن دەفيبريللياتورى ورناتىلدى. سول ارقىلى قاشىقتان باقىلاۋعا بولادى. ول ءۇشىن ناۋقاستىڭ ۇيالى تەلەفونىنا ارنايى باعدارلاما جۇكتەلەدى، دەپ حابارلايدى قازاقپارات ءتىلشىسى.

كارديولوگيا جانە ىشكى اۋرۋلار عىلىمي زەرتتەۋ ينستيتۋتىنىڭ باسقارما ءتوراعاسى مارات پاشيموۆتىڭ ايتۋىنشا، جۇرەك جەتكىلىكسىزدىگى اۋرۋىنا شالدىعىپ، دەفيبريللياتور قويىلعان ناۋقاستار قاشىقتان مونيتورينگ جۇيەسىنە قوسىلادى. مۇنداي تەحنولوگيا كەز كەلگەن جەردەن باقىلاۋعا مۇمكىندىك بەرەدى.

«الماتىدا العاش رەت ءبىزدىڭ كلينيكادا جۇرەك قىزمەتىنىڭ جەتكىلىكسىزدىگى بار پاتسيەنتتەرگە قاشىقتان مونيتورينگ جۇيەسىنە قوسۋ مۇمكىندىگىمەن جاڭا بۋىن دەفيبريللياتورلارى يمپلانتاتسيالاندى. مۇنداي تەحنولوگيا جۇرەكتىڭ كەنەتتەن توقتاپ قالۋىن، اۋرۋدىڭ اۋىر زارداپتارىن بولدىرماۋ ءۇشىن ەمدەۋ سحەماسىن تۇزەتەدى. بۇل رەسپۋبليكالىق ورتالىقتارعا دەفيفيبريلياتور يمپلانتاتسيالانعاننان كەيىن تەكسەرۋگە كەلە المايتىن ەلدىڭ باسقا ايماقتارىنان كەلگەن ناۋقاستار ءۇشىن وتە قولايلى. زاماناۋي تەحنولوگيالار پاتسيەنتتىڭ تەلەفونىنا ارنايى قوسىمشانى ورناتۋ ارقىلى باقىلاۋعا مۇمكىندىك بەرەدى. دەربەس دەرەكتەر شيفرلانادى جانە ورتالىقتاندىرىلعان سەرۆەرگە تۇسەدى، وعان تەك وسى سالاداعى سەرتيفيكاتتالعان ماماندار عانا قول جەتكىزە الادى»، - دەيدى مارات پاشيموۆ.

جۇرەك ىرعاعى مەن وتكىزگىشتىگىنىڭ بۇزىلۋى بولىمشەسىنىڭ مەڭگەرۋشىسى باگدات احىت ءسوزىنشى، قازىر قازاقستاندىق دارىگەرلەر كارديوستيمۋلياتوردى ەنگىزۋدى جاقسى مەڭگەرىپ العان. ءبىراق ەلەكترودتاردى يمپلانتاتسيالاۋ بويىنشا ءالى دە تاجىريبەنى ارتتىرا ءتۇسۋ كەرەك.

«ەكستراكتسيا (الۋ) كەزىندەگى كلينيكالىق جاعداي تەز وزگەرۋى مۇمكىن، سوندىقتان كوماندا كەز كەلگەن جاعدايعا دايىن بولۋى كەرەك. ۇزاق ۋاقىت يمپلانتاتسيالانعان ەلەكترود الىنعان كەزدە جۇرەك بۇلشىقەتىنىڭ جىرتىلۋى سياقتى اسقىنۋلارعا نەمەسە ولىمگە اكەلۋى مۇمكىن. مۇنداي جاعدايلاردا وپەراتسيا ناتيجەسى كوماندانىڭ - تەك اريتمولوگتار عانا ەمەس، سونىمەن قاتار انەستەزيولوگتار، ترانسفۋزيولوگتار، پەرفۋزيولوگتار، كارديوحيرۋرگتار، تەحنيكالىق قىزمەتكەرلەر جانە باسقالاردىڭ ۇيلەسىمدى جۇمىسىمەن قامتاماسىز ەتىلەدى»، - دەدى ول.

رەسەيلىك اريتمولوگ دارىگەر سەرگەي ارتەمەنكو قازاقستاندىق ارىپتەستەرىنە ءدال وسى جۇرەك ىرعاعى مەن وتكىزگىشتىگىنە قاتىستى بىلگەنىمەن بولىسۋگە ارنايى كەلگەن. 10 كۇن ىشىندە 50-گە جۋىق وپەراتسيا جاساۋ جوسپارلانىپ وتىر.

اۆتور

الما مۇقانوۆا