الماتىدا جەر سىلكىنىسى كەزىندە سيرەنا قوسىلماسا دا، قالاي ارەكەت ەتۋ كەرەكتىگى حابارلانۋعا ءتيىس ەدى - ت ج م

استانا. KAZINFORM - توتەنشە جاعدايلار ءمينيسترىنىڭ كەڭەسشىسى تالعات نۇرماعامبەتوۆ الماتىداعى جەر سىلكىنىسى كەزىندە كەتكەن كەمشىلىكتەردى اتادى.

«23- قاڭتارداعى وقيعالار ءبىزدىڭ مينيسترلىككە وڭاي تيگەن جوق. مەملەكەت باسشىسى باعا بەرگەندەي، ازاماتتىق قورعانىس بولىمشەلەرى قويىلعان مىندەتتى اتقارا المادى. ايتىلعان سىن قاتاڭ ءارى ادىلەتتى بولدى. ءمينيستردىڭ ۇيعارىمى بويىنشا، وسىنداي جاعدايعا اكەلگەن سەبەپتەردى انىقتاۋ ءۇشىن ورتالىق اپپاراتتان الماتىعا ارنايى توپ جىبەرىلدى. تەكسەرۋ قورىتىندىسى بويىنشا ءمينيسترىمىز اسىرەسە الماتى سياقتى مەگاپوليستە مۇنداي جاعدايعا ەندى جول بەرمەۋ جانە تارتىپتىك جازاعا تارتۋ تۋرالى اكت جاسادى. نەگىزگى سەبەپتەرىنە كەلسەك، حالىقتى قۇلاقتاندىرۋ جۇيەسى حابارلاۋعا قابىلەتتى بولعانىنا قاراماستان ۇيىمداستىرۋ جانە باسقارۋ جۇمىسىنىڭ السىزدىگىن ايتۋعا بولادى»، - دەدى ول.

ونىڭ سوزىنشە، قازىرگى تاڭدا دىبىستاپ قۇلاقتاندىرۋ قوندىرعىسى الماتىنى 100 پايىز قامتىپ تۇر.

«ءبىراق ونداي قوندىرعىمەن جەر سىلكىنە قالعان كەزدە قانداي ارەكەت بولۋ كەرەكتىگى سياقتى قاجەتتى اقپارات قانا بەرىلۋى كەرەك. وكىنىشكە قاراي، سيرەنا دابىلىن قوسپاۋ تۋرالى شەشىم قابىلدانعان كەزدە حالىققا نە ىستەۋ كەرەكتىگىن ءتۇسىندىرۋ حابارى دىبىستاپ تاراتىلۋى كەرەك بولعان. توتەنشە جاعدايلار دەپارتامەنتى ولاي ىستەمەگەن. ول جايىندا ايتىلدى. تاعى قايتالاپ ايتايىن، جاڭا قۇلاقتاندىرۋ قوندىرعىسى سىناقتان وتكىزىلىپ جاتىر. ول جەر سىلكىنە باستاسا اۆتوماتتى تۇردە حالىقتى قۇلاقتاندىرا الادى. سىناق ونىڭ جۇمىس ىستەيتىنىن كورسەتتى»، - دەدى مينيستر كەڭەسشىسى.

سونداي-اق، ول زارداپ شەككەن حالىقتى توپتاستىرۋعا ايتىلعان سىن مەن ەسكەرتۋ ورىندى ەكەنىن اتاپ ءوتتى.

«بۇل باعىتتا دا ۇيىمداستىرۋ جۇمىسى جۇرگىزىلەدى. تەكسەرۋ ادام قابىلدايتىن ورىنداردىڭ اكىمشىلىكتەرى مۇنداي جاعدايعا دايىن ەمەس ەكەنىن كورسەتتى. كەيبىرى جابىق جاتسا، كەيبىرى پانا ىزدەگەن حالىقتى كىرگىزبەي قويعان. ول باعىتتا دا ءتيىستى جۇمىس جۇرگىزىلەدى. جەكەلەگەن باسشىلارعا تارتىپتىك جازا قولدانىلادى»، - دەدى تالعات نۇرماعامبەتوۆ.