الماتىدا جۇمىس ىستەيتىن جاستارعا قانداي پاتەرلەر بەرىلەدى
الماتى. KAZINFORM - مەملەكەتتىك تۇرعىن ۇيمەن قامتاماسىز ەتۋ باعدارلامانى جۇزەگە اسىرۋ اياسىندا 2022-2023 -جىلدارى كوممۋنالدىق تۇرعىن ءۇي قورىنا ح ءا و ت پەن جۇمىس ىستەيتىن جاستارعا بولىنەتىن 4100 پاتەر بەرىلدى.
وسى جىلدىڭ سوڭىنا دەيىن قوسىمشا 3150 پاتەر ساتىپ الۋ جوسپارلانىپ وتىر، ونىڭ 2100 ى الەۋمەتتىك وسال توپقا جاتاتىن تۇرعىنعا، ال 1050 ءى جۇمىس ىستەيتىن جاستارعا ارنالعان.
الماتى اكىمى ەربولات دوسايەۆ الەۋمەتتىك وسال توپتار (ح ءا و ت) مەن جۇمىس ىستەيتىن جاستارعا جالعا بەرىلەتىن پاتەرلەر قاراستىرىلعان جاڭا «Alem City 3» تۇرعىن ءۇي كەشەنىن ارالاپ كوردى.
ەربولات دوسايەۆ مۇمكىندىگى شەكتەۋلى ازاماتتار ءۇشىن قولايلى ورتا قۇرۋدىڭ ماڭىزدىلىعىن اتاپ، تۇرعىن ۇيلەرگە پاندۋستار ورناتۋدى تاپسىردى. سونىمەن قاتار، جاڭا ۇيلەردى ۋاقىتىلى ينجەنەرلىك جەلىلەرگە قوسىپ، جىلۋ جانە سۋمەن جابدىقتاۋ جۇيەلەرىنىڭ تۇراقتى جۇمىسىن قامتاماسىز ەتۋگە تاپسىرما بەردى.
جۇمىس ىستەيتىن جاستارعا ءۇش جىلعا دەيىنگى مەرزىمگە ايىنا 7-15 مىڭ تەڭگە ارالىعىندا تولەممەن جالعا بەرۋ قاراستىرىلعان، الايدا ۇزارتۋ نەمەسە ساتىپ الۋ مۇمكىندىگى جوق. وسى كەزەڭدە جالعا الۋشى جاستار كەيىننەن ەكىنشى دەڭگەيلى بانكتەر ارقىلى يپوتەكاعا تۇرعىن ءۇي ساتىپ الۋ ءۇشىن دەپوزيتتە قاراجات جيناۋى كەرەك.
وسى جىلدىڭ 10 ايىندا 4828 ازامات تۇرعىن ۇيمەن قامتاماسىز ەتىلدى.
وسىعان دەيىن الماتىدا 43 مىڭنان استام ادام باسپانا كەزەگىندە تۇرعانى تۋرالى جازعان ەدىك.
ايتا كەتەيىك، «الماتى جاستارىنا» ءوتىنىم بەرگەن 2 مىڭعا جۋىق جاس باسپانالى بولدى.