الماتىدا جاياۋ جۇرگىنشىلەر ءجيى زارداپ شەگەتىن كوشە قيىلىستارى بەلگىلى بولدى

الماتى. KAZINFORM - الماتى قالاسىنىڭ پوليتسيا دەپارتامەنتى جول- كولىك وقيعالارى ءجيى بولاتىن قالاداعى قاۋىپتى ۋچاسكەلەردى اتادى.

جىل باسىنان بەرى مەگاپوليستە جاياۋ جۇرگىنشىلەر زارداپ شەككەن 650 جول-كولىك وقيعاسى بولدى. ونىڭ ىشىندە ادام ولىمىنە اكەلگەن جول اپاتتارى دا بار.

- الاتاۋ اۋدانىندا 80 جاياۋ جۇرگىنشىگە كولىكتىڭ زاردابى تيگەن، ونىڭ ءبىر جاعدايىندا ادام مەرت بولدى. اۋدانداعى قاۋىپتى ۋچاسكەلەر قاتارىنا رىسقۇلوۆ داڭعىلى، ساين جانە جانقوجا باتىر كوشەلەرى جاتادى.

- اۋەزوۆ اۋدانىندا مۇنداي فاكتىلەردىڭ سانى - 112، ەكى جاعدايدا ادام قازا تاپتى. قاۋىپتىلىگى جوعارى كوشەلەر قاتارىندا اباي داڭعىلى، ساين، شالياپين كوشەلەرى بار.

- بوستاندىق اۋدانىندا جول-كولىك وقيعالارىنا 102 جاياۋ جۇرگىنشى زارداپ شەككەن، ونىڭ ىشىندە 3 ادام كوز جۇمدى. جول اپاتتى ءجيى بولاتىر ۋچاسكەلەر: ءال-فارابي داڭعىلى، ساتبايەۆ جانە تيميريازيەۆ كوشەلەرى.

- جەتىسۋ اۋدانىندا 68 ادامدى كولىك قاعىپ كەتكەن جانە 1 ادام مەرت بولعان. مۇنداي فاكتىلەر كوبىنە بوكەيحانوۆ، كۋدەرين كوشەلەرىندە جانە رىسقۇلوۆ داڭعىلىندا تىركەلەدى.

- مەدەۋ اۋدانىندا 70 جاياۋ جۇرگىنشى جول-كولىك وقيعاسىنان زارداپ شەكتى، بىرەۋى قازا تاپتى. قاۋىپتى ۋچاسكەلەر: شىعىس اينالما اۆتوجولى، دوستىق داڭعىلى جانە قۇلجا تراكتىسى.

- ناۋرىزباي اۋدانىندا 44 ۇقساس جاعداي تىركەلگەن. مۇندا جول اپاتى ءاشىموۆ كوشەسى مەن رايىمبەك داڭعىلىندا ءجيى بولادى.

- تۇركسىب اۋدانىندا 78 جاعدايدا جاياۋ جۇرگىنشىلەر زارداپ شەككەن، ءبىر جاعدايدا ادام قازا تاپتى. مايلين، شولوحوۆ- ريحارد زورگە جانە ءسۇيىنباي كوشەلەرى قاۋىپتى دەپ تانىلدى.

ەسكە سالايىق، الماتىدا جۇك كولىگى 7 جاسار قىزدى باسىپ كەتكەنىن جازعانبىز.

7 جاسار قىزدىڭ ءومىرىن قيعان جول اپاتىنا كىم كىنالى ەكەنىن ساراپشىلار پايىمدادى.