الماتىدا جاستارعا تەگىن ءارى جاسىرىن كومەك كورسەتەتىن 14 مەديتسينالىق ورتالىق بار

الماتى. قازاقپارات  - 12-16- مامىر ارالىعىندا پرەزيدەنتتىڭ جانىنداعى ۇلتتىق كوميسسيانىڭ قولداۋىمەن قازاقستاندا رەسپۋبليكالىق رەپرودۋكتيۆتى دەنساۋلىق اپتاسى ءوتىپ جاتىر.

الماتى اكىمىنىڭ گەندەرلىك ماسەلە جونىندەگى شتاتتان تىس كەڭەسشىسى ايگۇل شالبايەۆا مەگاپوليستە بۇل اكسياعا بايلانىستى ۇلكەن ءىس- شارالار وتەتىنىن اتاپ ءوتتى.

ونىڭ ايتۋىنشا، جۇرگىزىلگەن زەرتتەۋ ايتۆ تۋرالى جاس وسپىرىمدەردىڭ 9 پايىزى عانا تولىق بىلەتىنىن كورسەتكەن. ال تاعى 60 پايىزى ودان قالاي ساقتانىپ، جۇكتىلىكتەن قالاي قورعانۋ كەرەكتىگىن مۇلدەم بىلمەيدى.

- ءبىز وسىنى اشىق ايتىپ، قوعامنىڭ كوزىن اشقىمىز كەلەدى. بۇل جۇمىسقا مامانداردى، دارىگەرلەردى، جۇرگىزۋشىلەردى، ەرىكتىلەر مەن اتا-انالاردى دا تارتىپ جاتىرمىز. جاستار دەنساۋلىعى ورتالىقتارىندا اشىق ءىس-شارالار، لەكسيالار ءوتىپ، جاسوسپىرىمدەرمەن اڭگىمەلەسىپ، ولارعا وسى جۇكتىلىك جاسى، پسيحيكالىق كوڭىل كۇيى تۋرالى جان-جاقتى اقپارات بەرىلەدى، - دەدى ول.

قالادا قازىر تەراپيەۆت، گينەكولوگ، ۋرولوگ، دەرماتولوگ، الەۋمەتتىك قىزمەتكەر، زاڭگەر سياقتى 128 مامانى بار وسىنداي 14 ورتالىق جۇمىس ىستەپ جاتىر.

- ورتالىقتار «4-د» نەگىزدەمەسىمەن جۇمىس ىستەيدى. ياعني، بارىنشا اشىق بولىپ، ءبىر- بىرىنە دەگەن سەنىم قالىپتاسادى وندا. بۇل دەگەن م ءا م س اياسىندا تەگىن قىزمەت كورسەتۋ، سىر اقتارىپ، جاستاردى مازالاعان ماسەلە تۋرالى وي ءبولىسىپ، سۇقباتتاسۋ دەگەن ءسوز، - دەدى الماتىنىڭ قوعامدىق دەنساۋلىق باسقارماسىنىڭ وكىلى دينا قۇسايىنوۆا.

جاستار دەنساۋلىعى ورتالىعىندا مىناداي قىزمەت كورسەتەدى:

- كونتراتسەپتسيا، وتباسىن جوسپارلاۋ، ايتۆ تۋرالى كەڭەس بەرەدى؛

- جۇقپالى اۋرۋدى انىقتاپ، ونى ەمدەۋ؛

- زورلىققا ۇشىراعاندارعا قولداۋ كورسەتۋ؛

- ادامنىڭ كوڭى كۇيىنە قاراي كەڭەس بەرىپ، الەۋمەتتىك بەيىمدەۋ؛

- زاڭگەردىڭ كومەگى؛

- اۋرۋدىڭ الدىن الۋ، لەكسيالار مەن ترەنينگتەر وتكىزۋ سىندى جۇمىستار دا بار.

جاستار ناقتى ءبىر ەمحاناعا بەكىتىلمەي-اق ورتالىققا كەلىپ قارالا بەرسە بولادى. ءبارىن قۇپيا ۇستاعىسى كەلگەندەردىڭ جەكە باسى تۋرالى مالىمەت ەش جەردە جاريالانبايدى.

ەسكە سالايىق، بۇعان دەيىن دەنساۋلىق ساقتاۋ مينيسترلىگى ەلىمىزدىڭ دەنساۋلىق ساقتاۋ جۇيەسىندە مەيىرگەرلەردىڭ ءرولى ەداۋىر ارتقانىن حابارلادى.

اۆتور

دوسبول اتاجان