الماتىدا جاساندى ينتەللەكتىنىڭ كومەگىمەن جۇرەككە ۋلترادىبىستىق زەرتتەۋ جۇرگىزىلدى

الماتى قالالىق كارديولوگيا ورتالىعىندا وزىق دياگنوستيكا جانە ەمدەۋ ادىستەرىنىڭ نەگىزدەرى شەڭبەرىندە «POCUS تۇجىرىمداماسى: كلينيكالىق تاجىريبەدە قولدانۋ جانە موبيلدى ۋلترادىبىستىق دياگنوستيكادا جاساندى ينتەللەكتى قولدانۋدىڭ ارتىقشىلىعى» تاقىرىبىندا شەبەرلىك سىنىبى ءوتتى، دەپ حابارلايدى Kazinform.

ءىس- شاراعا ارنايى شاقىرىلعان شەتەلدىك دارىگەر Hatem Soliman Aboumarie (Royal Brompton and Harefield Hospitals, London, UK) قاتىستى.

الماتى قالالىق قوعامدىق دەنساۋلىق ساقتاۋ باسرقارماسىنىڭ مالىمەتىنشە، POCUS (Point-of-Care Ultrasound) تۇجىرىمداماسى دارىگەرلەر ناۋقاستى تەكسەرۋ كەزىندە- اق، قوسىمشا ۋلترادىبىستىق دياگنوستيكالىق پروتسەدۋراعا جولداماسىز، وزدەرى ۋلترادىبىستىق زەرتتەۋ جۇرگىزەتىن ءتاسىل بولىپ تابىلادى. مۇنداي ءتاسىل ەمدەلۋشىنىڭ جاعدايىن ىڭعايلى جانە جىلدام باعالاۋعا مۇمكىندىك بەرەدى. دەمەك دياگنوستيكا ۋاقىتى قىسقارىپ، دەرەۋ ەمدەۋدى باستاۋ مۇمكىن بولادى.

«بۇل تۇجىرىمدامانى كلينيكالىق تاجىريبەدە قولدانۋ ءبىرقاتار ايقىن ارتىقشىلىققا يە. بىرىنشىدەن، ول جوعارى ساپالى دياگنوستيكانىڭ قول جەتىمدىلىگىن جاقسارتادى ءارى دارىگەرلىك قاتەلىكتەردىڭ ىقتيمالدىعىن ازايتادى. دارىگەرلەر پالاتادا، جەدەل جاردەمدە نە شۇعىل كومەك كورسەتۋ بولىمدەرىندە ناۋقاسقا ۋلترادىبىستىق زەرتتەۋدى تەز ءارى ءتيىمدى تۇردە جۇرگىزىپ، ناۋقاس ءومىرىن ساقتاپ قالا الادى»، - دەيدى قالالىق كارديولوگيالىق ورتالىق ديرەكتورى روزا قۋانىشبەكوۆا.

سونىمەن قاتار، موبيلدى ۋلترادىبىستىق دياگنوستيكادا جاساندى ينتەللەكتىنى قولدانۋدىڭ ارتىقشىلىعى ۋلترادىبىستىق زەرتتەۋ ارقىلى جينالعان ۇلكەن كولەمدەگى دەرەكتى وڭدەۋ جانە تالداۋ كونتەكستىندە ايقىن بولادى. ماشينالىق وقىتۋ جانە جاساندى ينتەللەكت الگوريتمدەرى الىنعان كەسكىندەردى تالداۋدى اۆتوماتتاندىرۋ، ناتيجەلەردى ينتەرپرەتاتسيالاۋ پروتسەسىن جەڭىلدەتۋ جانە دياگنوستيكالىق دالدىكتى ارتتىرۋعا مۇمكىندىك بەرەدى. جاساندى ينتەللەكتىنى قولدانۋ سونداي- اق ۋلترادىبىستىق دياگنوستيكانى ءارتۇرلى موبيلدى قۇرىلعىلار مەن قوسىمشالارعا بىرىكتىرۋدى جەڭىلدەتەدى.

Фото: Алматы қалалық қоғамдық денсаулық сақтау басқармасы

«ياعني، دياگنوستيكالىق جانە ەمدەۋ پروتسەسىنە قاتىسۋشىلار - باسقا ماماندىق دارىگەرلەرى، ماسەلەن، ەمدەۋشى دارىگەر، مەدبيكەلەر ۋلترادىبىستىق زەرتتەۋدى پايدالانا الادى جانە جۇرگىزە الادى. مۇنداي سەزبەكتەر قۇرىلعىنىڭ شاعىن ولشەمى مەن سالماعىنا بايلانىستى توتەنشە جاعداي مەديتسيناسىندا كەڭىنەن قولدانىلادى. ۆيزۋالدى اقپاراتتى سمارتفونعا سىمسىز تاسىمالداۋدى پايدالانۋ، ستاندارتتى ۋلترادىبىستىق اپپاراتقا قاراعاندا تومەن قۇنى ولاردى توتەنشە جاعدايدا، ونىڭ ىشىندە تابيعي جانە تەحنوگەندىك اپات كەزىندە پايدالانۋدى جەڭىلدەتەدى. ءوز كەزەگىندە ءبىز جاقىن ارادا بۇل تاجىريبەنى ءبىزدىڭ ورتالىقتا ەنگىزۋدى جوسپارلاپ وتىرمىز»، - دەيدى روزا قۋانىشبەكوۆا.

وسىلايشا، POCUS تۇجىرىمداماسى موبيلدى ۋلترادىبىستىق دياگنوستيكادا جاساندى ينتەللەكتىنى قولدانۋمەن بىرگە ناۋقاستىڭ جاعدايىن تەز، ءدال جانە قولجەتىمدى دياگنوستيكالاۋعا مۇمكىندىك بەرەدى. بۇل ەمدەۋ ناتيجەسىن جاقسارتۋعا جانە مەديتسينالىق كومەك الۋ ۋاقىتىن قىسقارتۋعا سەپتىگىن تيگىزەدى. جاساندى ينتەللەكتىڭ ارقاسىندا اۋرۋدى دالىرەك انىقتاۋعا، ونىڭ كەزەڭى مەن دامۋىن بىلۋگە بولادى.

شارا بارىسىندا دارىستەر وقىلىپ، پورتاتيۆتى ۋلترادىبىستىق دياگنوستيكالىق جۇيەنى قولدانۋ ارقىلى جۇرەك پاتولوگياسى بار ناۋقاستارعا زەرتتەۋلەر جۇرگىزىلدى.

«شەبەرلىك ساباعى قاتىسۋشىلاردىڭ كاسىبي ءبىلىمىن تولىقتىرىپ قانا قويماي، قالانىڭ مەديتسينا سالاسىنىڭ دامۋىنا زور ۇلەس قوستى»، - دەپ اتاپ ءوتتى قالالىق قوعامدىق دەنساۋلىق ساقتاۋ باسقارماسىندا.

اۆتور

دۋمان ارعىنگەلدى