الماتىدا جارتىلاي مارافونعا قاتىسقان ەكى ادام قايتىس بولدى

الماتى. KAZINFORM - الماتىداعى Almaty Half Marathon شاراسى كەزىندە ەكى ادام كوز جۇمدى.

مارافون ۇيىمداستىرۋشىلارى ءمالىم ەتكەندەي، جۇگىرۋ كەزىندە ەكى قاتىسۋشى كوز جۇمدى. ونىڭ ءبىرى - 84 جاستاعى اققويان رساليەۆ بولسا، ەكىنشىسى 21 جاستاعى نۇربول احمادي.

- ۇيىمداستىرۋشىلار رەگلامەنتكە ساي ارەكەت ەتتى: مەديتسينالىق قىزمەتتەر، جەدەل قىزمەتتەر جانە پوليتسيا جەدەل جانە ۋاقىتىلى قىزمەت كورسەتتى. الايدا قولعا الىنعان شارالارعا قاراماستان، قاتىسۋشىلاردىڭ ءومىرىن ساقتاپ قالۋ مۇمكىن بولمادى، - دەلىنگەن حابارلامادا.

جارتىلاي مارافون 20 - ساۋىردە تاڭەرتەڭ تۇڭعىش پرەزيدەنت ساياباعىنان ورتالىق ستاديونعا دەيىنگى باعىت بويىنشا ءوتتى.

ۇيىمداستىرۋشىلاردىڭ ايتۋىنشا، اققويان رساليەۆ 2021 -جىلدان بەرى جارىستارعا تۇراقتى تۇردە قاتىسىپ جۇرگەن. بۇعان دەيىن الماتى جارتىلاي مارافونى مەن الماتى مارافونىندا 21,1 شاقىرىم جانە 10 شاقىرىم قاشىقتىقتى ءساتتى باعىندىرعان.

بۇگىنگى جارتىلاي مارافوننىڭ العاشقى كيلومەترىندە ءال-فارابي داڭعىلىنىڭ بويىندا ەر ادام كەنەتتەن ءوزىن جايسىز سەزىنىپ، ءبىر مينۋتتان سوڭ وعان جەدەل جاردەم بريگاداسى كومەككە كەلگەن. ول كەزدە جۇرەك سوعىسى بولماعان.

- ساعات 8:15 تە پوليسيا دەپارتامەنتىنىڭ قىزمەتكەرلەرى قاتىسۋشى قۇلاپ قالعانىن ءمالىم ەتتى. جەدەل جاردەم ءبىر مينۋتتىڭ ىشىندە جەتكەن كەزدە، جۇرەك سوعىسى بولماعان. رەانيماتسيالىق شارالار حاتتاماعا ساي جاسالدى. الدىن الا قورىتىندى بويىنشا وعان وكپە ارتەرياسىنىڭ ترومبوەمبولياسى دەگەن دياگنوز قويىلعان. وندا سوزىلمالى ارتەريالدى گيپەرتەنزيا بولعان، - دەپ حابارلادى 2/51 بريگادانىڭ دارىگەرى الىبەك قوجانازاروۆ.

قايتىس بولعان ەكىنشى ادام - نۇربول احمادي. ول دا بۇعان دەيىن Winter Run 2025 شاراسىندا 10 ك م اراقاشىقتىققا جۇگىرۋگە قاتىسقان. استانا مەن الماتىدا وتەتىن جارتىلاي مارافونعا، سونىمەن بىرگە الماتىداعى مارافونعا تىركەلگەن.

بۇگىن جارتىلاي مارافوننىڭ 16-كيلومەترىندە ول ەسىنەن تانىپ قالعان. وقيعا ورنىنا كەلگەن دارىگەرلەر رەانيماتسيالار شارالار جاساعان. الايدا بريگادا كەلگەنشە ول قايتىس بولىپ كەتكەن.

- 09:18 دە وقيعا ورنىنا جەتكەن كەزدە ۇيقى ارتەرياسىندا جۇرەك سوعىسى سەزىلمەگەن، تىنىس الۋ توقتاعان، قان قىسىمى نولگە تەڭ بولدى. رەنايماتسيالىق شارالار حاتتاماعا ساي جاسالدى. ناتيجە بولمادى. 103 بريگاداسى كەلگەنشە ول جان تاپسىردى. الدىن الا دياگنوز - وكپە ارتەرياسىنىڭ ترومبوەمبولياسى، جەدەل جۇرەك جەتكىلىكسىزدىگى، - دەپ اتاپ ءوتتى 8/58 بريگادا دارىگەرى ايگەرىم ەسداۋلەتوۆا.

دارىگەرلەر قاتىسۋشىلار ءولىمى سوت-مەديتسينالىق ساراپاتامادان سوڭ انىقتالاتىنى جانە ونىڭ ناتيجەلەرىن جاقىن ارادا مارقۇمداردىڭ تۋىستارىنا حابارلايتىنىن جەتكىزدى.

- جۇگىرۋ شاراسىندا قاتىسۋعا تىركەلۋ كەزىندە بارلىق قاتىسۋشى فيزيكالىق تۇرعىدا سپورتتىق شاراعا قاتىسۋعا دايىن ەكەنىن جانە ءوز دەنساۋلىعىنى ءۇشىن تولىقتاي جاۋاپكەرشىلىك الاتىنى تۋرالى قولحات جازادى. بۇل وسىنداي مارافوندار وتكىزۋ كەزىندەگى الەمدە قولدانىلاتىن تاجىريبە. Almaty Marathon قاتىسۋشىلارىنا ارناپ ءبىز جىل بويى تۇراقتى تۇردە قاۋىپسىز جۇگىرۋگە دايىندالۋ تاقىرىبىندا ساراپشىلاردى شاقىرىپ، تەگىن اشىق جاتتىعۋلار مەن دارىستەر وتكىزەمىز. شارا باستالاتىن كۇنى تاماقتانۋ ورىندارىندا جەدەل كومەك كورسەتۋ ءۇشىن بارلىق قاجەتتى جابدىعى بار مەديتسينالىق ۇجىم وتىرادى. جۇگىرۋ باعىتتارىن الدىن الا پوليتسيا، جەدەل جاردەم بريگادالارى تالقىلايدى، - دەدى «ءبىرىنشى بولۋ — باتىلدىق» كورپوراتيۆتىك قوردىڭ اتقارۋشى ديرەكتورى سالتانات قازىبايەۆا.

قور مارقۇمداردىڭ تۋىستارىمەن حابارلاستى. وتباسىلارىنا ماتەريالدىق كومەك كورسەتۋدى جوسپارلاپ وتىر.

ەسكە سالايىق، 2022 -جىلى الماتى مارافونىنىڭ قاتىسۋشىسى، 47 جاستاعى رۇستەم سادىقوۆ مارە سىزىعىن كەسىپ وتكەنەن كەيىن قايتىس بولعان ەدى.