الماتىدا دارىگەرلەر جۇرەك تامىرى 99 پايىزعا زاقىمدانعان ناۋقاستى قۇتقاردى
الماتى. KAZINFORM - الماتىلىق كارديولوگتار جۇرەك تامىرىنىڭ زاقىمدانۋى %99,9 دى قۇراعان ناۋقاستى امان الىپ قالدى. بۇل تۋرالى الماتى قالاسىنىڭ قوعامدىق دەنساۋلىق ساقتاۋ باسقارماسى حابارلادى.
ناۋقاس الماتى قالالىق كارديولوگيالىق ورتالىعىنا ءجىتى ميوكارد ينفاركتىمەن اۋىر كۇيدە كەلىپ تۇسكەن. شۇعىل كوروناروگرافيانى ورىنداۋ ناتيجەسىندە جۇرەكتىڭ باستى تامىرى ءدىڭىنىڭ 99,9 پايىزعا زاقىمدانعانى، سونداي-اق بۇرىن ورناتىلعان ءۇش شۋنتتىڭ بىرەۋى عانا جۇمىس ىستەگەنى انىقتالدى.
الماتى قالالىق كارديولوگيالىق ورتالىعىنىڭ ينتەرۆەنتسيالىق كارديولوگى ايجان قۇلانبايەۆانىڭ ايتۋىنشا، ناۋقاس ورتالىقتا 20 كۇن بولعان. مۇنداي جاعداي وتە سيرەك كەزدەسەدى.
وتا ءۇش ساعاتتان استام ۋاقىتقا سوزىلىپ، دارىگەرلەردىڭ بۇكىل كومانداسى پاتسيەنتتىڭ ءومىرىن قۇتقارۋعا بار كۇشىن سالدى. دارىگەرلەردىڭ كاسىبيلىگى مەن جەدەل ارەكەتتەرىنىڭ ارقاسىندا ناۋقاستىڭ جاعدايىن تۇراقتاندىرۋعا جانە قاجەتتى ەم-دوم جاساۋعا مۇمكىندىك تۋعان. پاتسيەنت قازىرگى ۋاقىتتا ۇيگە شىعارىلدى.
اۆتور
دوسبول اتاجان