الماتىدا دارىگەرلەر 8 ساۋساقپەن تۋعان بالاعا بىرەگەي وپەراتسيا جاسادى
الماتى. KAZINFORM - الماتىداعى № 2 قالالىق بالالار كلينيكالىق اۋرۋحاناسىندا اياق-قولدىڭ تۋابىتتى جانە جۇرە پايدا بولعان كەمىستىكتەرىنىڭ زاردابىن تارتىپ كەلە جاتقان بالالارعا رەكونسترۋكتيۆتىك وتالار جاسالدى.
- ر ف- نىڭ سانكت-پەتەربۋرگ قالاسىنان شاقىرىلعان حيرۋرگ سەرگەي گولياننىڭ جەتەكشىلىگىمەن وتكەن شەبەرلىك ساعاتى بارىسىندا 8 قازاقستاندىق بالاعا كۇردەلى وتا جاسالدى. رەسەيدىڭ اتاقتى پلاستيكالىق حيرۋرگى تاعى 20 كىشكەنتاي پاتسيەنتكە كونسۋلتاتسيا بەرىپ، وتاندىق ارىپتەستەرىمىزگە ميكروحيرۋرگيا سالاسىنداعى وزىق ادىستەمەلەر جونىندە لەكسيا وقىدى. بۇل شارانىڭ قازاقستانداعى بالالار ميكروحيرۋرگياسىن دامىتۋعا قوسار ۇلەسى زور، - دەيدى № 2 قبكا ديرەكتورى مارات راباندياروۆ.
اۋرۋحانانىڭ باسپا ءسوز قىزمەتىنەن ءمالىم ەتكەندەي، پاتسيەنتتەردىڭ ەڭ كىشىسى 1 جاستا. بالا 8 ساۋساقپەن تۋعان. پوليفالانگيا دەپ اتالاتىن كەمىستىك سالدارىنان ءوسىپ كەلە جاتقان بالانىڭ قولىنداعى ارتىق ساۋساقتار ويىنشىقتاردى ۇستاپ، الاقانىن اشىپ-جۇمۋعا كەدەرگى كەلتىرگەن.
- ءبىز ءۇشىن بۇل كەرەمەت جاڭالىق بولدى. وسىنداي وتانى الماتىدا، تەگىن جاساتامىز دەگەن وي ءۇش ۇيىقتاساق تۇسىمىزگە كىرمەگەن ەدى، - دەيدى اناسى.
ايتا كەتەيىك، كۇردەلى وپەراتسيالاردىڭ ءبارى م ءا م س قاراجاتى ەسەبىنەن جاسالدى.
وسىعان دەيىن اقتاۋدا شەتەلدىك دارىگەرلەر 3 بالاعا كۇردەلى وتا جاساعان بولاتىن.
اۆتور
الما مۇقانوۆا