الماتىدا داۋ تۋدىرعان ساتبايەۆ ەسكەرتكىشى قايدا كوشىرىلەدى
الماتى. KAZINFORM - الماتىدا قانىش ساتبايەۆ ەسكەرتكىشىن كوشىرۋ ماسەلەسى قوعامدا قىزۋ تالقىلانىپ جاتىر. الەۋمەتتىك جەلىلەردە بۇل باستاماعا قارسى پىكىر كوپ ايتىلىپ، تۇرعىندار تاريحي تۇلعانىڭ ەسكەرتكىشىن قازىرگى ورنىنان جىلجىتۋدى «قۇرمەتسىزدىك» دەپ وتىر.
جەلىدە جاريالانعان جازبالاردا الماتىلىقتار:
• الاقانداي تار جەرگە قايداعى تەاتر - قانىش ساتبايەۆتى مازاق قىلعاندارىڭ با؟!
• ۇلى قازاقتىڭ ەسكەرتكىشىن قوزعاۋعا بولمايدى! كوشىرگەن سوڭ قۇندىلىعى جوعالادى، تاريحي نىساندى تيىسپەي ساقتاپ قالۋىمىز كەرەك»
• «امفيتەاتر سالامىز دەگەن سىلتاۋمەن تاريحتى ىعىستىرۋ دۇرىس ەمەس» دەگەن پىكىر جازىپ جاتىر.
كەيبىر قولدانۋشىلار ءتىپتى بۇل شەشىمگە قارسى كوشەگە شىعىپ، نارازىلىق بىلدىرەتىنىن دە جازعان.
الماتىنىڭ قوعامدىق كەڭىستىكتەردى دامىتۋ باسقارماسى بۇعان قاتىستى Kazinform.kz تىلشىسىنە رەسمي تۇسىنىك بەردى.
ۆەدومستۆونىڭ مالىمەتىنشە، ساتبايەۆ ەسكەرتكىشى بۇزىلمايدى، تەك گەولوگتار اللەياسىنىڭ اۋماعىندا 50 مەتر جەر وڭتۇستىك-باتىسقا - قانىش ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى كورپۋسىنىڭ باس كىرەبەرىسىنە اۋىستىرىلادى.
باسقارما ەسكەرتكىشتى كوشىرۋ ماسەلەسى الدىن الا مامانداندىرىلعان ۇيىمدى تارتا وتىرىپ قاراستىرىلعانىن مالىمدەدى.
- بۇل - قازاقستان رەسپۋبليكاسى مادەنيەت جانە سپورت مينيسترلىگى بەرگەن №22004987 ليتسەنزياسىنا (15.03.2022 ج. ) جانە قازاقستان رەسپۋبليكاسى ءبىلىم جانە عىلىم مينيسترلىگى بەرگەن عىلىمي جانە عىلىمي-تەحنيكالىق قىزمەت سۋبەكتىسى رەتىندە №00282 اككرەديتاتسيا كۋالىگىنە يە «كۇمبەز» مامانداندىرىلعان جوبالاۋ- رەستاۆراتسيالىق فيرماسى ج ش س. اتالعان ۇيىم ماماندارى جۇرگىزگەن زەرتتەۋ مەن ساراپتاما ناتيجەسىندە ەسكەرتكىشتى گەولوگتار اللەياسى شەگىندەگى جاڭا ورىنعا كوشىرۋ ۇسىنىلدى. بۇل شەشىم ەسكەرتكىشتىڭ جاڭارتىلعان قوعامدىق كەڭىستىك ارحيتەكتۋرالىق- كومپوزيتسيالىق شەشىمىنە اسەرلى كىرىگۋىن، عىلىمي جانە ءبىلىم بەرۋ ورتاسى ءۇشىن سيمۆولدىق ءمانىن ايقىنداۋدى جانە مادەني مۇرا نىسانىنىڭ ءتيىستى ساقتالۋىن قامتاماسىز ەتەدى، - دەلىنگەن حابارلامادا.
بوسايتىن جەردە اشىق اسپان استىنداعى امفيتەاتر سالىنادى، ول ستۋدەنتتەر مەن قالا تۇرعىندارىنا ارنالعان مادەني جانە عىلىمي ءىس-شارالارعا ارنالادى.
- ۋنيۆەرسيتەتتىڭ رەسمي وتىنىشىنە سايكەس بوسايتىن جەردە ءتۇرلى اۋقىمداعى ءىس-شارالاردى - عىلىمي كونفەرەنسيالاردان باستاپ مادەني جانە ستۋدەنتتىك كەزدەسۋلەرگە دەيىن وتكىزۋگە ارنالعان اشىق اسپان استىنداعى امفيتەاتر سالۋ كوزدەلگەن. ول اللەيانىڭ اباتتاندىرىلعان اۋماعىنا بىرىكتىرىلىپ، ستۋدەنتتەر، عالىمدار جانە قالا تۇرعىندارى ءۇشىن ماڭىزدى تارتىلىس نۇكتەسىنە اينالادى، - دەلىنگەن رەسمي جاۋاپتا.
جوبا بويىنشا قۇرىلىس- مونتاج جۇمىستارى باستالىپ تا كەتكەن.
- قازىرگى ۋاقىتتا جوباعا سايكەس قولدانىستاعى تاس توسەۋىشتەر مەن كىشى ساۋلەتتىك فورمالاردى بولشەكتەۋ جۇمىستارى جۇرگىزىلىپ جاتىر. بارلىق ءىس-شارا زاڭناماعا سايكەس جۇزەگە اسىرىلادى جانە قالالىق ورتانىڭ ساپاسىن جاقسارتۋعا، مادەني-تاريحي كەلبەتىن دامىتۋعا باعىتتالعان. ساڭىراۋقۇلاق پىشىنىندەگى كولەڭكەلى ورىنداردىڭ ورنىنا امفيتەاتر ورناتىلادى، - دەپ حابارلادى باسقارمادان.
الماتىنىڭ قوعامدىق كەڭىستىكتەردى دامىتۋ باسقارماسى اكىمدىك ەسكەرتكىشتىڭ جاڭا ورىنعا كوشۋى ونىڭ تاريحي-مادەني ءمانىن ساقتاپ، كەرىسىنشە كورنەكىلىگىن ارتتىرادى دەپ وتىر.
- جاڭا ورىندا ەسكەرتكىش كورنەكى قابىلداۋ مەن قوعامدىق نازارعا اناعۇرلىم قولجەتىمدى بولادى. بۇل ونىڭ ماڭىزىن ايقىنداپ، تاريحي- مادەني قۇندىلىعىن ساقتاۋعا مۇمكىندىك بەرەدى. ال قازىرگى ورنىندا ەسكەرتكىشتىڭ كورنەكىلىگى شەكتەلىپ، قورشاعان ورتانىڭ ىشىندە كوزگە تۇسپەي قالىپ، ءوزىنىڭ قالاداعى سيمۆولدىق قىزمەتىن تولىق اتقارا الماي وتىر. بۇل ونىڭ ءمان-ماڭىزىن تومەندەتىپ جانە قوعامدىق سانادا تاريحي ءرولىن السىرەتەدى، - دەلىنگەن جاۋاپتا.
وسىعان دەيىن الماتى مەن وبلىس اراسىنداعى ماڭىزدى اۆتوجول كەڭەيتىلىپ جاتقانى تۋرالى جازدىق.
اۆتور
مەيىرمان لەس