الماتىدا ءورت-قۇتقارۋ سپورتى بويىنشا الەم چەمپيوناتى وتەدى

استانا. KAZINFORM - الماتىدا 15-18-تامىز ارالىعىندا جاسوسپىرىمدەر مەن جاستار، جاسوسپىرىم قىزدار مەن بويجەتكەن قىزدار اراسىندا 2024 -جىلعى ءورت-قۇتقارۋ سپورتىنان الەم چەمپيوناتى وتەدى، دەپ حابارلايدى ق ر ت ج م باسپا ءسوز قىزمەتى.

2014 -جىلى الماتىدا ەرەسەكتەر اراسىندا الەم چەمپيوناتى وتكەن بولاتىن، ءدال سول كەزدە ءورت- قۇتقارۋ سپورتى تاريحىندا العاش رەت ايەلدەر اراسىندا الەم چەمپيوناتى وتكىزىلدى.

الەمدەگى ۇزدىك جاس ءورت ءسوندىرۋشى-قۇتقارۋشى اتاعى ءۇشىن التى ەلدىڭ بەلارۋس، بولگاريا، قازاقستان، رەسەي، سلوۆاكيا، چەحيا كوماندالارى اراسىندا سايىس وتەدى. سونىمەن قاتار، كامەرۋن مەن ساۋد ارابياسىنىڭ وكىلدەرى باقىلاۋشى رەتىندە شاقىرىلعان.

ءتورت كۇن بويى سپورتشىلار ءورتتى ءسوندىرۋ تاجىريبەسىندە قولدانىلاتىن ءتۇرلى سىناقتاردى باعىندىرادى.

سالتاناتتى اشىلۋ ءراسىمى 15-تامىزدا ساعات 20.00-دە ورتالىق ستاديوندا وتەدى. شوۋ ارنايى وتتى ەففەكتىلەرمەن، ەسترادا جۇلدىزدارىنىڭ قاتىسۋىمەن وتەتىن كونسەرتتىك باعدارلامامەن، ت ج جاعدايىندا ءورت سوندىرۋشىلەردىڭ كۇشىن كورسەتەتىن قۇتقارۋشى سپورتشىلاردىڭ جاندى قويىلىمدار كورسەتۋىمەن وتەدى. سونداي- اق قاتىسۋشى كوماندالاردىڭ شەرۋى ۇيىمداستىرىلادى.

18-تامىزدا ساعات 20:00-دە سالتاناتى جابىلۋ ءراسىمى جانە الەم چەمپيوناتىنىڭ جەڭىمپازدارىن ماراپاتتاۋ ءراسىمى بولادى. ورتالىق ستاديوندا «Has Sak» ەتنو-فولكلورلىق توبىنىڭ ارتىستەرى ونەر كورسەتەدى. ءىس-شارا سالتاناتتى وتشاشۋمەن اياقتالادى.