الماتىدا ءالى ومىرگە كەلمەگەن بالالارعا وپەراتسيا جاسالدى

استانا. قازاقپارات - الماتىدا ءالى ومىرگە كەلمەگەن بالاعا وپەراتسيا جاسالدى، - دەپ حابارلايدى Tengrinews.kz.

دەنساۋلىق ساقتاۋ مينيسترلىگىنىڭ مالىمەتىنشە، قۇرساقىشىلىك ءۇش وتا جاسالعان. الماتىداعى بالالار كارديوحيرۋرگياسى جانە پەريناتولوگيا ورتالىعىندا قۇرساقتاعى ۇرىققا وتا ءساتتى جۇرگىزىلدى، بۇل تۋا ءبىتتى بولاتىن پاتولوگيانى تۇزەتۋگە سەپتىك ەتىپ، ءسابيدىڭ دۇنيەگە دەنى ساۋ بولىپ كەلۋ مۇمكىندىگىن ارتتىرادى.

ورتالىق دارىگەرلەرى مينسك رەسپۋبليكالىق عىلىمي-تاجىريبەلىك «انا مەن بالا» ورتالىعى فەتالدى مەديتسينا بولىمشەسىنىڭ مەڭگەرۋشىسىمەن بىرگە الماتى قالاسى، الماتى جانە اقمولا وبلىستارىنان كەلگەن ءۇش جۇكتى ايەلگە وتا جاسادى.

وتانى جاساۋ اياسىندا مىنا جۇمىستار اتقارىلعان:

فەتو-فەتالدى ترانسفۋزيا سيندرومىنان (ف ف س) اسقىناتىن كوپ ۇرىقتى جۇكتىلىك كەزىندەگى بالانىڭ جولداسى اناستوموزىنىڭ لازەرلى كواگۋلياتسياسى. بۇل ءادىس ۇرىقتار اراسىنداعى تامىرلاردىڭ پاتولوگيالىق بىرىگۋىن جويۋعا سەپتىك ەتىپ، سونىڭ ارقاسىندا قاتتى اسقىنۋدىڭ الدىن الادى جانە ەگىزدەردىڭ ەكەۋىنىڭ دە ءومىرىن ساقتايدى.
شارانا سۇيىقتىعى پاتولوگياسى بولعان جاعدايداعى امنيورەدۋكسيا جانە امنيوينفۋزيا. بۇل پروتسەدۋرالار ۇرىقتىڭ دامۋىنا قولايلى جاعداي تۋعىزا جانە اسقىنۋ قاۋپىن ازايتا وتىرىپ شارانا سۇيىقتىعى مولشەرىن رەتتەۋگە كومەكتەسەدى.
ۇرىقتىڭ بۇيرەك پاتولوگياسى بولعاندا قۋىقتى درەناجداۋ. بۇل وتا ۇرىقتىڭ نەسەپ ايداۋ جۇيەسىنىڭ دۇرىس جۇمىس ىستەۋىن قامتاماسىز ەتەدى جانە ونىڭ دۇرىس دامۋ مۇمكىندىگىن جاقسارتا وتىرىپ بۇيرەك جەتىسپەۋشىلىگى اسقىنۋىنىڭ الدىن الادى.
د س م مالىمەتىنشە، بارلىق وتا ءساتتى جاسالعان، ناۋقاستاردىڭ جاعدايى ءدال قازىرگى ساتتە تۇراقتى. ولاردىڭ جۇكتىلىك كەزىندەگى دەنساۋلىعىن ماماندار باقىلاپ، ۇرىقتىڭ ودان ءارى دۇرىس دامۋىن قامتاماسىز ەتىپ وتىر.