الماتىدا بىلتىر بيۋدجەتتەن 47 ميلليارد تەڭگە يگەرىلمەگەن - اكىم ورىنباسارى جاۋاپ بەردى

الماتى. KAZINFORM - الماتىدا قالالىق ءماسليحاتتىڭ كەزەكتى XXX سەسسياسى ءوتتى. وندا 2024 -جىلعى الماتى قالاسىنىڭ بيۋدجەتىن اتقارۋ ماسەلەلەرى تالقىلاندى.

الماتى قالاسى قارجى باسقارماسىنىڭ باسشىسى قانات سۋحامبەكوۆ مەگاپوليستىڭ كىرىسى تۋرالى باياندادى. ونىڭ ايتۋىنشا، الماتىدا بىلتىر مەملەكەتتىك بيۋدجەتكە 5,6 تريلليون تەڭگە تۇسكەن، ونىڭ ىشىندە 5,5 تريلليون تەڭگە - سالىق تۇسىمدەرى. رەسپۋبليكالىق بيۋدجەتكە 3 تريلليون 731,9 ميلليارد تەڭگە، جەرگىلىكتى بيۋدجەتكە 1 تريلليون 874 ميلليارد تەڭگە تۇسكەن.

الماتى قالاسىنىڭ ءار اۋدانى بويىنشا بيۋدجەتتىك تۇسىمدەر: بوستاندىق اۋدانى - 29,8، مەدەۋ اۋدانى - 23,8، المالى اۋدانى - 19,9، اۋەزوۆ اۋدانى - 7,9، جەتىسۋ اۋدانى - 7,2، تۇركسىب اۋدانى - 5,8، الاتاۋ اۋدانى - 3,7، ناۋرىزباي 1,9 پايىز بولدى.

- بىلتىر الماتى قالاسىنىڭ دامۋ بيۋدجەتىنە 263 ميلليارد تەڭگە ءبولىنىپ، ونىڭ 250 ميلليارد تەڭگەسى يگەرىلدى. ءبىلىم بەرۋ سالاسىنا 99 ميلليارد تەڭگە، سۋمەن قامتاماسىز ەتۋگە 39,4 ميلليارد تەڭگە، جول ينفراقۇرىلىمىنا 29,4 ميلليارد تەڭگە، تۇرعىن ءۇي سالاسىنا 6,5 ميلليارد تەڭگە، دەنساۋلىق ساقتاۋ سالاسىنا 3,6 ميلليارد تەڭگە جانە وزگە سالالارعا 71,6 ميلليارد تەڭگە باعىتتالدى، - دەدى قانات سۋحامبەكوۆ.

قارجى باسقارماسىنىڭ باسشىسى وتكەن جىلدىڭ قورىتىندىسى بويىنشا يگەرىلمەگەن بيۋدجەت 47,1 ميلليارد تەڭگە ەكەنىن اتاپ ءوتتى. ونىڭ ىشىندە جەرگىلىكتى بيۋدجەتكە 43 ميلليارد تەڭگە قايتارىلعان. اتاپ ايتقاندا:

- قۇرىلىس باسقارماسى 27,9 ميلليارد تەڭگە؛

- قالالىق موبيلدىلىك باسقارماسى 5,3 ميلليارد تەڭگە؛

- جۇمىسپەن قامتۋ جانە الەۋمەتتىك باعدارلامالار باسقارماسى 3,4 ميلليارد تەڭگە؛

- ەنەرگەتيكا جانە سۋمەن جابدىقتاۋ باسقارماسى 3,3 ميلليارد تەڭگە؛

- قوعامدىق كەڭىستىكتەردى دامىتۋ باسقارماسى 2 ميلليارد تەڭگە قاراجاتتى يگەرمەگەن.

سەسسيا بارىسىندى الماتى ءماسليحاتىنىڭ دەپۋتاتى رامازان بەكبول يگەرىلمەگەن بيۋدجەت بويىنشا قالا اكىمىنىڭ ورىنباسارى بەيبىت شاحانوۆقا سۇراق قويدى.

- قۇرىلىس باسقارماسى تۇرعىن ءۇيدى ساتىپ الۋ باعىتى بويىنشا 24,5 ميلليارد تەڭگە جۇمساۋى قاجەت ەدى. نەلىكتەن بۇل قاراجات قايتارىلدى؟ نەلىكتەن ورىندالماي جاتىر؟ - دەدى دەپۋتات.

بەيبىت شاحانوۆ تاپسىرىسقا سالىنىپ جاتقان ۇيلەر تالاپقا ساي بولماعاندىقتان، وعان قاراستىرىلعان قاراجات بيۋدجەتكە قايتارىلعانىن ايتتى.

- الماتىدا تۇرعىن ءۇي كۇتىپ، كەزەكتە تۇرعان ازاماتتاردىڭ سانى 45 مىڭعا جەتتى. سونى شەشۋ ءۇشىن تۇرعىن ءۇيدى ساتىپ الۋ قاراجاتىن بۇرىن-سوڭدى بولماعان كولەمگە جەتكىزدىك. وتكەن جىلى 3 مىڭ پاتەر ساتىپ الدىق. ونىڭ تاپسىرىسى بيىل بولاتىن، ءبىراق قۇرىلىسشىلارعا بىلتىر جىل سوڭىنا دەيىن وتكىزۋگە تالاپ قويدىق. قۇرىلىسشىلار بىزگە پاتەرلەرىن ۇسىندى. ءبىراق ءبىز ونى تولىق قابىلدامادىق. ويتكەنى ءبىزدىڭ تالاپتارىمىزعا سايكەس بولمادى. جارتىلاي قابىلدادىق، قالعانىن 24 ميللياردتىڭ پاتەرلەرى تالاپقا سايكەس بولماعاندىقتان ونى وسى جىلعا قالدىردىق. بيىل جوسپارلى تۇردە قالاعا بەرىلەدى، وتباسى بانك ارقىلى تاراتىلادى. نەگىزگى ماقسات - كەزەكتە تۇرعان ادامدارعا ساپالى پاتەر بەرۋ. ۇيلەردى قابىلداپ الىپ، اقشانى يگەرە سالماي، ساپالى پاتەر قابىلداۋ ءۇشىن سونداي شەشىم قابىلداندى، - دەدى بەيبىت شاحانوۆ.

ەسكە سالايىق، بۇعان دەيىن الماتىدا قاراۋسىز قالعان عيماراتتار قاشان جوندەلەتىنىن جازعانبىز.

اۆتور

دوسبول اتاجان