الماتىدا بەيبىت جيىندار مەن شەرۋلەر وتكىزۋ ورىندارى وزگەردى

الماتى. KAZINFORM - ءماسليحات دەپۋتاتتارى بۇقارالىق ءىس-شارالار كەزىندە كوشەلەردىڭ ءماجبۇرلى جابىلۋىنا بايلانىستى كولىك قوزعالىسىنا كەدەرگىلەر كەلتىرمەۋ ماقساتىندا كەزەكتى XXII سەسسيادا ءتيىستى شەشىم قابىلدادى.

قوعامدىق دامۋ باسقارماسىنىڭ باسشىسى ايدار ەسەنبەكوۆ بۇگىنگى تاڭدا بۇگىندە بەيبىت جينالىستار وتكىزۋگە ارنالعان مامانداندىرىلعان ورىندار - م. گاندي اتىنداعى ساياباق، ش. ءۋاليحانوۆ اتىنداعى جانە «سارى- ارقا» كينوتەاترىنىڭ ارتىنداعى سكۆەرلەر. شەرۋلەر ءۇشىن شيەۆچەنكو كوشەسى بويىمەن ش. ءۋاليحانوۆ اتىنداعى سكۆەردەن م. گاندي اتىنداعى ساياباققا دەيىن جۇرۋگە بولادى.

ش. ءۋاليحانوۆ اتىنداعى سكۆەردى جوندەگەن سوڭ كولىك قۇرالدارىنىڭ وقشاۋلانعان تۇراقتاردى جايلاستىرۋعا، قاۋىپسىز ورىنداردى، سيگنالدىق باعانالار مەن جاياۋ جۇرگىنشىلەر وتكەلدەرىن جاساۋعا بايلانىستى شيەۆچەنكو كوشەسىنىڭ ەنى ازايدى. سونىمەن قاتار، بۇقارالىق ءىس- شارالاردى وتكىزۋ كەزىندە شيەۆچەنكو كوشەسى بويىمەن دوستىق داڭعىلىنان قونايەۆ كوشەسىنە دەيىنگى قوزعالىس جابىلادى. بۇل كەپتەلىستەرگە، باسقا كوشەلەرگە شامادان تىس جۇكتەمەلەرگە، مارشرۋتتاردىڭ وزگەرۋىنە جانە قوعامدىق كولىك كەستەسىنىڭ بۇزىلۋىنا، جولاۋشىلار مەن اۆتوكولىك جۇرگىزۋشىلەرىنىڭ قولايسىزدىعىنا اكەلەدى.

سونىمەن قاتار، قالا تۇرعىندارىنان وسى سكۆەردە ميتينگ وتكىزبەۋگە، ونىڭ تىنىشتىقتى بۇزاتىندىعىنا، سونداي-اق سكۆەردىڭ تاريحي كەلبەتىنە نۇقسان كەلتىرەتىنىنە قاتىستى وتىنىشتەر كەلىپ ءتۇستى.

جوعارىدا ايتىلعانداردى ەسكەرە وتىرىپ، مامانداندىرىلعان ورىندى ش. ءۋاليحانوۆ اتىنداعى سكۆەردەن (تولىمدىعى 1000 ادام) ابىلاي حان داڭعىلىنداعى ا. يمانوۆ اتىنداعى سكۆەرگە (تولىمدىعى 500 ادام) اۋىستىرۋ تۋرالى ۇسىنىس ءتۇستى، مۇندا كوشەلەردى جابۋدىڭ قاجەتى بولمايدى جانە جاقىن جەردە تۇرعىن ۇيلەر جوق.

قالانىڭ مامانداندىرىلعان ورىندارىن بۇرىن بەلگىلەنگەن قامتۋدى ساقتاۋ ماقساتىندا «سارى- ارقا» كينوتەاترىنىڭ ارتىنداعى سكۆەردىڭ تولىمدىلىعى 500 دەن 1000 ادامعا دەيىن وزگەرتىلدى.

سونىمەن قاتار، سانكتسيالانعان شەرۋلەر نەمەسە دەمونستراتسيالار وتكىزۋ باعىتى وزگەرتىلدى. جاڭا باعىت جامبىل كوشەسىمەن گاگارين داڭعىلىنان مۇقانوۆ كوشەسىنە دەيىن وتەدى. شيەۆچەنكو كوشەسىندەگى بۇرىنعى باعىت كولىك اعىندارىنا كەدەرگى كەلتىردى، ويتكەنى ول سەيفۋللين، نازاربايەۆ، ابىلاي حان داڭعىلدارى، جەلتوقسان، ناۋرىزباي باتىر كوشەلەرى سياقتى قالانىڭ ماگيسترالدىق ارتەريالارىن كەسىپ ءوتتى.

ءوز كەزەگىندە، جامبىل كوشەسىندەگى جۇكتەمە ازايادى، گاگارين داڭعىلىنان مۇقانوۆ كوشەسىنە دەيىنگى ارالىقتا 2 جولاق قاراستىرىلعان، سونىمەن قاتار ماگيسترالدىق كوشەلەرمەن قيىلىستار جوق.

دەپۋتاتتار بۇل وزگەرىستەردى كوپشىلىك داۋىسپەن قولدادى. اتاپ ايتقاندا، قازاقستان حالىقتىق پارتياسى الماتى قالالىق فليالىنىڭ ءتوراعاسى نۇرسۇلتان شوقانوۆ ميتينگىلەر ءۇشىن جاڭا ورىن قوسىمشا قولايسىزدىقتار تۋعىزبايتىنىن، ساياسي پارتيالار مەن قوعامدىق بىرلەستىكتەردىڭ قىزمەتىنە بەلگىلى ءبىر جاڭالىق ەنگىزەتىنىن اتاپ ءوتتى.

«شەرۋلەردى وتكىزۋ باعىتتارىن وزگەرتۋدى قولدايمىن، ويتكەنى بۇرىن بەلگىلەنگەن باعىت قالانىڭ ماگيسترالدى كوشەلەرىمەن قيىلىسىپ، قالا تۇرعىندارى ءۇشىن قولايسىزدىقتار مەن كوپتەگەن پروبلەمالار تۋعىزدى. «سارى- ارقا» كينوتەاترىنىڭ ارتىنداعى سكۆەردەگى ورىننىڭ تولىمدىعى 1000 ادامعا دەيىن ۇلعايتىلعانى قۋانتادى. ءبىز 500 ادامعا ارنالعان ميتينگ وتكىزدىك، وندا 1000 ادام جايلى ورنالاسادى دەپ ويلايمىن»، - دەدى نۇرسۇلتان شوقانوۆ.