الماتىدا بولاشاق انالارعا سكرينينگتىڭ ەۋروپالىق ستاندارتى قولجەتىمدى بولادى
الماتى. KAZINFORM - الماتىدا قالاسىنداعى پەريناتولوگيا جانە بالالار كارديوحيرۋرگياسى ورتالىعىندا ساراپتامالىق دەڭگەيدەگى ۋلترادىبىستىق زەرتتەۋ، بيوحيميالىق سكرينينگ جانە گەنەتيكالىق كەڭەس بەرۋدى قامتيتىن «ءبىر كۇندىك كلينيكا» پيلوتتىق جوباسى ىسكە قوسىلدى.
جوبا اياسىندا بولاشاق انالارعا سكرينينگتىڭ ەۋروپالىق ستاندارتى قولجەتىمدى بولادى. ياعني، بۇل دارىگەرلەرگە ىشتەگى نارەستەنىڭ تۋا بىتكەن جانە حروموسومالىق پاتولوگيانى جەدەل ءارى ءدال انىقتاۋعا مۇمكىندىك بەرەدى.
سونداي-اق ىشتەگى نارەستەنىڭ ءومىرى مەن دەنساۋلىعى ءۇشىن ماكسيمالدى ءدال بولجام جاساي الادى. بارلىق قاجەتتى مەديتسينالىق تەكسەرۋلەر ءبىر ۇيىمدا جۇرگىزىلەدى. وسى ارقىلى بولاشاق انالار ۋاقىتىن ۇنەمدەپ قانا قويماي، ءبىر كۇننىڭ ىشىندە بارلىق ناتيجەلەرگە جىلدام قول جەتكىزەدى. زەرتتەۋلەر زاماناۋي دياگنوستيكالىق جابدىقتا ەۋروپالىق ۇيىمنىڭ الگوريتمى بويىنشا تەكسەرىلەدى.
بارلىق جۇكتى ايەلدەر ەمحانانىڭ جولداماسى بويىنشا تەگىن تەكسەرىلە الادى. زەرتتەۋ رەسپۋبليكا كولەمىندە العاش رەت ۇيىمداستىرىلىپ وتىرعان ء«بىر كۇندىك كلينيكا» پيلوتتىق جوباسى اياسىندا وتەدى.
ق ر دەنساۋلىق ساقتاۋ مينيسترلىگىنىڭ مەديتسينالىق كومەكتى ۇيىمداستىرۋ دەپارتامەنتىنىڭ ديرەكتورى ماعريپا ەمبەرگەنوۆانىڭ ايتۋىنشا، سوڭعى 10 جىلدا ەل اۋماعىندا تۋا بىتكەن اۋىتقۋى بار بالالاردىڭ تۋۋ جيىلىگى تومەندەمەگەن.
«وسىعان بايلانىستى مينيسترلىك ۇرىقتىڭ تۋا بىتكەن اقاۋىن ەرتە دياگنوستيكالاۋ جانە الدىن الۋ تيىمدىلىگىن ارتتىرۋعا، نارەستە ءولىمىن جانە بالالار مۇگەدەكتىگىن تومەندەتۋگە باعىتتالعان پرەناتالدىق مەديتسينا قىزمەتىن ودان ءارى جەتىلدىرۋ بويىنشا ءبىرقاتار ستراتەگيالىق شەشىمدى نەگىزدەدى، ولاردى ءوز كەزەگىندە حالىقارالىق ساراپشىلار وڭ باعالادى. پرەناتالدى ۋلترادىبىستىق دياگنوستيكا جانە مەديتسينالىق گەنەتيكا بويىنشا جەتەكشى ساراپشىلاردان تۇراتىن ساراپشىلار توبى قۇرىلدى. توپ قازاقستان رەسپۋبليكاسىنداعى پرەناتالدى سكرينينگ ەرەجەلەرىن قايتا قاراۋعا قاتىستى. العاش رەت ەلدە پەرەناتالدىق مەديتسينا قىزمەتىنىڭ جۇمىسىن رەتتەيتىن نورماتيۆتىك قۇجات - پەرەناتالدى ۋلترادىبىستىق دياگنوستيكانى ۇيىمداستىرۋ جانە مەديتسينالىق- گەنەتيكالىق كومەك كورسەتۋ ستاندارتتارى ازىرلەندى، «ۇرىقتى قورعاۋ» رەسپۋبليكالىق ورتالىعى قۇرىلىپ، 20 ايماقتا «ۇرىقتى قورعاۋ ورتالىعىنىڭ» جۇمىسى ۇيىمداستىرىلدى»، - دەيدى ق ر دەنساۋلىق ساقتاۋ مينيسترلىگىنىڭ مەديتسينالىق كومەكتى ۇيىمداستىرۋ دەپارتامەنتىنىڭ ديرەكتورى ماعريپا ەمبەرگەنوۆا.
الماتى قالاسى پەريناتولوگيا جانە بالالار كارديوحيرۋرگياسى ورتالىعى تۋا بىتكەن جۇرەك اقاۋىن پەرەناتالدىق دياگنوستيكالاۋعا جانە جۇكتىلىك كەزىندە ءار ءتۇرلى اۋرۋى بار ايەلدەرگە كومەك كورسەتۋگە ماماندانعان جەتەكشى مەديتسينالىق مەكەمە.
«ءبىز پاتسيەنتتەرىمىزگە بولاشاق بالانىڭ دەنساۋلىعىنا قاتىستى ەڭ ءدال جانە ۋاقتىلى دياگنوز قويۋعا تىرىسامىز. ءبىر كۇندىك كلينيكا جۇكتى ايەلدەرگە ءبىر كۇن ىشىندە بارلىق تەكسەرۋدەن وتۋگە مۇمكىندىك بەرەدى. مۇندا «وسىندا جانە قازىر» پرينتسيپى ماڭىزدى ءرول اتقارادى. ەندى ءبىز ەمدەلۋشىلەرگە مەملەكەتتىك تەگىن مەديتسينالىق كومەك اياسىندا ەڭ زاماناۋي مەديتسينالىق دياگنوستيكا مەن ەمدەۋ ادىستەرىن ۇسىنا الامىز»، - دەپ اتاپ ءوتتى الماتى قالاسى پەريناتولوگيا جانە بالالار كارديوحيرۋرگياسى ورتالىعىنىڭ ديرەكتورى گۇلنار نۇرلانوۆا.
اۆتور
الما مۇقانوۆا