الماتىدا بايگەدەن قازاقستان چەمپيوناتىنىڭ ىرىكتەۋ كەزەڭى وتەدى

 الماتى.قازاقپارات – 11-مامىر كۇنى ساعات 12:00 دە الماتى يپپودرومىندا رەسپۋبليكالىق جارىستىڭ فينالىنا جولداما ساراپقا سالىنادى.

جارىسقا ەلىمىزدىڭ ۇزدىك شاباندوزدارى قاتىسپاق. سايىس «قۇنان بايگە»، «توپ بايگە»، «الامان بايگە» جانە «جورعا جارىس» اتتى بايگەنىڭ 4 ءتۇرى بويىنشا وتەدى. سونىمەن قاتار سپورتتىق سايىس اياسىندا ايەلدەر اراسىندا «ۇلتتىق سەزىم» اتتى ۇلتتىق كيىمدەر بايقاۋى وتەدى. بۇل - قىزدارعا ۇلتتىق كيىممەن ءوزىن كورسەتۋ ارقىلى ءوز ءستيلى مەن سۇلۋلىعىن كورسەتۋگە تاماشا مۇمكىندىك.

ايتا كەتكەن ءجون، بايگەدەن قازاقستان چەمپيوناتىندا ۇزدىك اتانعان شاباندوزدار 2024 -جىلدىڭ 8-14-قىركۇيەگى ارالىعىندا استانادا وتەتىن دۇنيەجۇزىلىك كوشپەندىلەر ويىندارىنا قاتىسادى. جارىسقا الەمنىڭ 100 دەن استام ەلىنەن 3000 عا جۋىق قاتىسۋشى كەلەدى دەپ جوسپارلانعان. دۇنيەجۇزىلىك كوشپەندىلەر ويىندارىندا ات جارىسى، ۇلتتىق كۇرەس تۇرلەرى، ءداستۇرلى زياتكەرلىك ويىندار، جەكپە- جەكتەن جارىستار، ءداستۇرلى ساداق اتۋ، قۇس سالۋدىڭ ۇلتتىق تۇرلەرى، ات ۇستىندەگى سايىستار، حالىق ويىندارى، سونداي- اق ەتنيكالىق سپورت تۇرلەرىنەن كورسەتىلىم قويىلىمدارى وتەدى.