الماتىدا بالالار ۇيىنەن كەتىپ قالعان ەكى قىز ىزدەستىرىلىپ جاتىر

الماتى. KAZINFORM - الماتىدا ەكى تاربيەلەنۋشى بالالار ۇيىنەن قاشىپ كەتكەن.

ۆولونتەرلەر مالىمەتىنشە، ىزدەستىرىلىپ جاتقان قىزداردىڭ ءبىرىنىڭ جاسى 14 تە، ەكىنشىسى 16 دا.

الماتى قالاسىنىڭ پوليتسيا دەپارتامەنتى بالالار مەكەمەسىنەن ەكى تاربيەلەنۋشىنىڭ ءوز بەتىمەن كەتىپ قالۋ دەرەگى بويىنشا بوستاندىق اۋداندىق پوليتسيا باسقارماسى ىزدەستىرۋ ءىسىن قوزعاعانىن حابارلادى.

- بۇعان دەيىن دە كامەلەتكە تولماعاندار مەكەمەدەن بىرنەشە رەت كەتىپ قالعان، ءار جولى ولار پوليتسيا قىزمەتكەرلەرىنىڭ كۇشىمەن تابىلىپ، قايتارىلعان. قازىرگى ۋاقىتتا ولاردىڭ قايدا ەكەنىن انىقتاۋعا باعىتتالعان جەدەل- ىزدەستىرۋ شارالارى كەشەنى جۇرگىزىلىپ جاتىر، - دەپ حابارلادى دەپارتامەنتتەن.

سونىمەن قاتار قالالىق پوليتسيا وسىعان ۇقساس جاعدايلار بويىنشا مەكەمە باسشىلىعىمەن پروفيلاكتيكالىق جانە ءتۇسىندىرۋ جۇمىستارى بۇعان دەيىن دە جۇرگىزىلگەنىن مالىمدەدى

- تاربيەلەنۋشىلەرگە باقىلاۋدى كۇشەيتۋ قاجەتتىگى ەسكەرتىلگەن، - دەپ حابارلادى پوليتسيا.

ەسكە سالايىق، «باعاناشىل» بالالار ءۇيىنىڭ تاربيەلەنۋشىلەرى جوندەۋ كەزىندە الماتىدا وقۋىن جالعاستىراتىنىن جازعانبىز.