الماتىدا «ازالى تاريحقا ايرىقشا تاعزىم» كورمەسى اشىلدى
الماتى. KAZINFORM - الماتى مۋزەيىندە ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى جانە كورنەكتى مەملەكەت قايراتكەرى تۇرار رىسقۇلوۆتىڭ، بەلگىلى جازۋشىلار، قازاقتىڭ ءۇش بايتەرەگى - ساكەن سەيفۋلليننىڭ، ءىلياس جانسۇگىروۆتىڭ، بەيىمبەت ءمايليننىڭ تۋعانىنا 130 جىل تولۋىنا وراي «ازالى تاريحقا ايرىقشا تاعزىم» اتتى كورمەنىڭ اشىلۋى ءوتتى.
«31-مامىر - قازاقتىڭ باسىنا تۇسكەن ۇلكەن ويرانداردان قازا بولعان، قۇربان بولعان ازاماتتارىمىزدى ەسكە الۋ كۇنى. قاسىرەت كۇنى دەپ ايتۋعا دا بولادى. سوندىقتان 1993 -جىلى قازاقستاننىڭ ءبىرىنشى پرەزيدەنتى ن. نازاربايەۆتىڭ جارلىعىمەن ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى رەتىندە بەلگىلەنگەن. سودان بەرى اتالىپ، ءوتىپ كەلە جاتىر. رەسپۋبليكا كولەمىندە، باسقا جەرلەردە دە ءوتىپ جاتادى، ءبىراق سونىڭ ىشىندە الماتىنىڭ ورنى مەن ءۇشىن ەرەكشە. بۇگىن الماتى مۋزەيى 31-مامىرعا وراي كورمە ۇيىمداستىرىپ وتىر ەكەن. بۇل ءبىزدىڭ بولاشاعىمىزدى باستايتىن ۇرپاقتارىمىزعا كەرەك. مۇراجايعا كەلگەن جاستار مۇلدە باسقا ساباق الادى. قازاقتىڭ قاسىرەتىن كورگەن كەزدە ولاردىڭ بويىندا ۇلتجاندىلىق ويانادى»، - دەدى رەسپۋبليكالىق ساياسي قۋعىن-سۇرگىنگە ۇشىراعاندار قاۋىمداستىعىنىڭ ءتوراعاسى جۇمابەك اشۋ ۇلى.
كورمەدە مۋزەي قورىنداعى فوتوسۋرەتتەر، مۇراعاتتىق قۇجاتتار، سول جىلدارعا ءتان زاتتاي ايعاقتار، كورنەكتى مەملەكەت قايراتكەرى تۇرار رىسقۇلوۆتىڭ، تەمىربەك جۇرگەنوۆتىڭ، بەلگىلى جازۋشىلار ساكەن سەيفۋلليننىڭ، ءىلياس جانسۇگىروۆتىڭ، بەيىمبەت مايليننىڭ ت. ب. تەرگەۋ ءىسى قۇجاتتارى مەن مانسۇر ءعاتاۋليننىڭ كىلەمشەسى، پەنالى، سۇلتانبەك قوجانوۆتىڭ قويىن داپتەرى، ىقىلاس كارەنەيەۆتىڭ جەكە ءمورى مەن الجير- دە وتىرعان ايەلدەردىڭ قولدان جاساعان تاسبيىعى جانە ولاردىڭ بالالارىنا ارناپ توقىعان كەستە بۇيىمدارى قويىلعان.
«وقۋ باعدارلامارىندا، مەكتەپ پەن ۋنيۆەرسيتەتتەردە اۋىزشا ايتۋ بولەك، ۇلت قايراتكەرلەرىنىڭ ەڭبەگىن وسىنداي كورمەلەردەن كورگەن بولەك بولادى. سوندىقتان مۇنداي كورمەلەردىڭ ماقساتى - سانالى ۇرپاق تاربيەلەۋ. ويتكەنى ولار ارحيۆ قۇجاتتارىن كورەدى. زيالىلار قولدانعان زاتتارى كورگەندە كەز كەلگەن ادام بەيجاي قالمايدى. جاپونيا، وڭتۇستىك كورەيا، قىتايدا وقۋشىلار مەن ستۋدەنتتەر ءوز ەلىنىڭ تاريحىنا قاتىستى كورمەلەرگە كەلىپ تۇرادى، بۇل مىندەتتەلگەن. بىزدە وسىنداي مادەنيەتكە قول جەتكىزۋىمىز كەرەك»، - دەدى باۋىرجان يمانعاليەۆ.
كورمە 14-ماۋسىمعا دەيىن جالعاسادى.