الماتىدا اۆتوبۋس اپاتى نەگە جيىلەدى

الماتى. KAZINFORM - الماتىنىڭ قوعامدىق كولىكتەرى سوڭعى 4 جىلدا مىڭعا جۋىق مارتە جول اپاتىنا ۇشىراعان.

ەلىمىزدىڭ وڭتۇستىك استاناسىندا سوڭعى جىلدارى اۆتوبۋستىڭ اپاتقا ۇشىراپ، ادامداردىڭ قايتىس بولۋ فاكتىلەرى كوبەيدى. الماتى قالاسى پوليتسيا دەپارتامەنتىنىڭ مالىمەتىنە سايكەس، مەگاپوليستە 4 جىلدا بولعان 920 جول-كولىك وقيعاسىنا قوعامدىق كولىكتىڭ قاتىسى بار.

• 2021 -جىلى جالپى 264 ج ك و، قايتىس بولعاندار - 9؛ جاراقات العاندار - 344.

• 2022 -جىلى جالپى 208 ج ك و، قايتىس بولعاندار - 7؛ جاراقات العاندار - 318.

• 2023 -جىلى جالپى 314 ج ك و، قايتىس بولعاندار - 6؛ جاراقات العاندار - 357.

• 2024 -جىلدىڭ 6 ايىندا 134 ج ك و؛ قايتىس بولعاندار - 3؛ جاراقات العاندار - 167.

ايتىلعان جول-كولىك وقيعالارىنىڭ ىشىندە حالىق اراسىندا كەڭىنەن رەزونانس تۋدىرعان مىسالداردى ەسكە الايىق.

2022 -جىلى 8-قاراشا كۇنى الماتىدا تولە بي - ابىلاي حان كوشەلەرىنىڭ قيىلىسىندا ەكى اۆتوبۋس سوقتىعىسقان بولاتىن. جول اپاتى سالدارىنان 1 ادام كوز جۇمىپ، 21 ادام زارداپ شەكتى.

بۇل اۆتوبۋس اپاتىنا № 98-اۆتوبۋس جۇرگىزۋشىسى كىنالى دەپ تانىلىپ، ول 2,5 جىلعا باس بوستاندىعىنان ايىرىلدى.

2023 -جىلى 22-جەلتوقساندا № 47-باعىتتاعى اۆتوبۋس جۇرگىزۋشىسىن جولاۋشى ۇرىپ، سالدارىنان كولىك باسقارۋسىز كۇيدە ايالدامادا تۇرعان ءبىر توپ ادامدى باسىپ كەتتى.

اپات سالدارىنان 7 ادام زارداپ شەگىپ، 3 ادام قايتىس بولدى.

سوت شەشىمىمەن جول اپاتىنا كىنالى دەپ تابىلعان جولاۋشى د. احمەتجانوۆ 8 جىلعا سوتتالدى.

2024 -جىلى 26-ماۋسىم كۇنى № 18-باعىتتاعى اۆتوبۋس اپاتقا ۇشىراپ، ءبىر ادام قازا تاپتى. بۇل جول- كولىك وقيعاسىنا جەڭىل كولىكتى باسقارعان «5:32» سەريالىنىڭ پروديۋسەرى سەبەپكەر بولعانى حابارلاندى.

بيىل 16-شىلدە كۇنى جۇك كولىگى ايالداما كەشەنىندە توقتاعان № 137-اۆتوبۋستى سوعىپ، سالدارىنان 9 جولاۋشى زارداپ شەكتى.

قالالىق پوليتسيا دەپارتامەنتى قوعامدىق كولىكتىڭ ءجيى جول اپاتىنا ۇشىراۋىنا جول ەرەجەسىنىڭ ساقتالماۋى سەبەپ بولاتىنىن جەتكىزدى.

- جول-كولىك وقيعاسى جول ەرەجەسىن ساقتاماۋ سالدارىنان (جۇرگىزۋشىلەردىڭ جىلدامدىقتى اسىرۋى، اپاتتىق جاعدايلار تۋىنداۋى، اراقاشىقتىقتى ساقتاماۋ، الكوگول نەمەسە ەسىرتكى، پسيحوتروپتى زاتتار قابىلداۋ، جول بەلگىلەرىنە، باعدارشامنىڭ نۇسقاۋىنا قاراماۋ) بولادى. اۆتوبۋس اپاتىنىڭ الدىن الۋ ماقساتىندا الماتى قالاسىندا رەسپۋبليكالىق جانە جەرگىلىكتى دەڭگەيدە پروفيلاكتيكالىق ءىس-شارالار جۇرگىزىلەدى، - دەدى قالالىق پ د باسپا ءسوز قىزمەتى.

سونداي-اق الماتى پوليتسياسى وتكەن اپتادا «اۆتوبۋس» جەدەل الدىن الۋ شاراسىن وتكىزىلگەنىن حابارلادى.

- اۆتوكولىكپەن جولاۋشى مەن جۇك تاسىمالدايتىن جۇرگىزۋشىلەردىڭ كولىكتىك جانە ەڭبەك ءتارتىبىن ارتتىرۋ، تەحنيكالىق اقاۋى بار نەمەسە قايتا جابدىقتالعان جولاۋشىلار كولىگىنىڭ جۇمىس ىستەۋىنە جول بەرمەۋ، سونداي- اق زاڭسىز جولاۋشىلار تاسىمالىنىڭ جولىن كەسۋدى قولعا الدىق. بۇل جۇمىسقا مۇددەلى مەمورگان وكىلدەرى دە، ازاماتتىق قوعام دا بارىنشا اتسالىسۋدا، - دەدى الماتى قالالىق پ د اكىمشىلىك پوليتسيا باسقارماسىنىڭ باستىعى اسحات قۇلبايەۆ.

الماتى اكىمدىگىنىڭ مالىمەتىنشە، بۇگىنگى كۇنى قالادا 22 جەكە تاسىمالداۋشى مەن ءبىر كوممۋنالدىق اۆتوبۋس پاركى قىزمەت كورسەتەدى. كۇندەلىكتى 2468 اۆتوبۋس جولعا شىعادى.

ولاردىڭ قولدانىلۋ مەرزىمى 7 جىلدان اسپايدى جانە ورتاشا جاسى - 3 جىل. جالپى قالالىق قوعامدىق كولىك 1,5 ميلليونعا جۋىق جولاۋشىعا قىزمەت كورسەتەدى.

سوڭعى 4 جىلدا جەرگىلىكتى بيۋدجەت ەسەبىنەن 1050 اۆتوبۋس جانە 100 تروللەيبۋس ساتىپ الىنعان.

الماتى قالاسىنىڭ اكىمدىگى بيىل قوسىمشا 600 اۆتوبۋس، 100 ەلەكتروبۋس جانە 112 تروللەيبۋس جەتكىزىلەتىنىن حابارلايدى.

وعان قوسا، جىل سوڭىنا دەيىن 400 جاڭا اۆتوبۋس ساتىپ الۋ جوسپارلانعان.

ەسكە سالايىق، 19-شىلدە كۇنى الماتى ءماسليحاتىنىڭ شەشىمىمەن قوعامدىق كولىكتە جول اقىسى كوتەرىلىپ، قولما-قول تولەم الىپ تاستالدى.

اۆتور

دوسبول اتاجان