تاشكەنتتە وزبەكستان مەن قازاقستان ىنتىماقتاستىعى تالقىلاندى - ءو ز ا
تاشكەنت قالاسىنداعى ورتالىق ازيا حالىقارالىق ينستيتۋتىندا «وزبەكستان - قازاقستان وداقتاستىق قاتىناستارىنىڭ جاڭا كەزەڭى: بۇحارا سامميتىنەن كەيىنگى قادامدار» تاقىرىبىندا دوڭگەلەك ۇستەل ءوتتى.
بۇل تۋرالى وسى اپتادا «ءو ز ا» اقپارات اگەنتتىگى حابارلادى.
حابارلامادا ايتىلۋىنشا، ءىس-شارا بارىسىندا ەكى ەل اراسىنداعى ىنتىماقتاستىقتىڭ قازىرگى جاي- كۇيى مەن بولاشاعى تالقىلاندى. 2025 -جىلدىڭ قورىتىندىسى بويىنشا ءوزارا ساۋدا كولەمى 4,8 ميلليارد دوللارعا جەتىپ، ءبىر جىلدا 16,2 پايىزعا ارتقانى ايتىلدى. تاراپتار بۇل كورسەتكىشتى 10 ميلليارد دوللارعا جەتكىزۋدى ستراتەگيالىق ماقسات رەتىندە بەلگىلەدى. سونداي- اق جالپى قۇنى 3,8 ميلليارد دوللار بولاتىن 52 بىرلەسكەن ينۆەستيتسيالىق جوبا جۇزەگە اسىرىلىپ جاتىر.
جيىندا ساراپشىلار قازاقستان مەن وزبەكستان اراسىنداعى قارىم- قاتىناس ستراتەگيالىق ارىپتەستىك پەن وداقتاستىق دەڭگەيىنە كوتەرىلگەنىن اتاپ ءوتتى. پارلامەنتارالىق ىنتىماقتاستىقتىڭ دا ماڭىزى ارتىپ، ساۋدا-ەكونوميكالىق، ينۆەستيتسيالىق جانە مادەني- گۋمانيتارلىق بايلانىستاردى دامىتۋعا سەرپىن بەرىپ وتىرعانى ايتىلدى.
دوڭگەلەك ۇستەل قورىتىندىسىندا ەكىجاقتى جانە وڭىرلىك ارىپتەستىكتى ودان ءارى تەرەڭدەتۋ جونىندە ۇسىنىستار ازىرلەندى.
سونداي-اق «ءو ز ا» - دا «وزبەكستان مەن قازاقستان ساقتاندىرۋ سالاسىنداعى ىنتىماقتاستىقتى نىعايتتى» دەگەن تاقىرىپتاعى اقپارات جاريالاندى.
وزبەكستاندىق باسىلىمنىڭ حابارلاۋىنشا، وزبەكستان مەن قازاقستان ساقتاندىرۋ سالاسىنداعى ارىپتەستىكتى جاڭا دەڭگەيگە كوتەرىپ، ءوزارا تۇسىنىستىك تۋرالى مەموراندۋمعا قول قويدى.
قۇجات وزبەكستان رەسپۋبليكاسىنىڭ ساقتاندىرۋ تولەمدەرىن كەپىلدەندىرۋ قورى مەن قازاقستان رەسپۋبليكاسىنىڭ «ساقتاندىرۋ تولەمدەرىن كەپىلدەندىرۋ قورى» اق اراسىندا جاسالدى. كەلىسىم ازاماتتاردىڭ قۇقىقتارىن قورعاۋ تەتىكتەرىن كۇشەيتۋگە جانە ساقتاندىرۋ جۇيەسىن دامىتۋعا باعىتتالعان.
مەموراندۋم اياسىندا تاراپتار تاجىريبە الماسۋ، قۇقىقتىق جانە ۇيىمداستىرۋشىلىق شەشىمدەردى زەردەلەۋ، سونداي-اق زاماناۋي باسقارۋ مەن تسيفرلىق تەحنولوگيالاردى ەنگىزۋ بويىنشا ىنتىماقتاستىقتى كەڭەيتپەك. سونىمەن قاتار ساقتاندىرۋ جۇيەسىنىڭ تۇراقتىلىعىن ارتتىرۋ كوزدەلگەن.
اتالعان كەلىسىم ەكى ەلدىڭ ساقتاندىرۋ نارىعىن دامىتۋعا، قىزمەت ساپاسىن ارتتىرۋعا جانە سالاداعى ينستيتۋتسيونالدىق نەگىزدەردى نىعايتۋعا ىقپال ەتپەك.
قازاقستان تۇركى ينتەگراتسياسىن نىعايتۋعا ەرەكشە ءمان بەرەدى - Eurasia Today
قازاقستان تۇركى مەملەكەتتەرى ۇيىمى (ت م ۇ) اياسىنداعى ينتەگراتسيالىق ۇدەرىستەردى ودان ءارى دامىتۋ مەن نىعايتۋعا ەرەكشە ءمان بەرەتىنىن مالىمدەدى، دەپ حابارلادى Eurasia Today اقپارات اگەنتتى.
اتالعان باسىلىمنىڭ دەرەگىنشە، بۇل تۋرالى قازاقستان رەسپۋبليكاسىنىڭ سىرتقى ىستەر ءمينيسترى ەرمەك كوشەربايەۆ تۇركى مەملەكەتتەرى ۇيىمىنىڭ باس حاتشىسى كۋبانىچبەك ومۋراليەۆپەن كەزدەسۋى بارىسىندا ايتتى. كەزدەسۋدە تاراپتار ۇيىم شەڭبەرىندەگى ىنتىماقتاستىقتى تەرەڭدەتۋ جانە بىرلەسكەن جوبالاردى ىسكە اسىرۋ ماسەلەلەرىن تالقىلادى.
مينيستر قازاقستاننىڭ تمۇ- نىڭ قۇرىلۋىنا باستاماشى ەل رەتىندە تۇركى الەمى ەلدەرى اراسىنداعى ءوزارا ءىس-قيمىلدى كۇشەيتۋگە مۇددەلى ەكەنىن اتاپ ءوتتى. سونداي-اق وڭىرلىك جانە جاھاندىق وزەكتى ماسەلەلەر بويىنشا پىكىر الماسۋ جۇرگىزىلدى.
تۇركى مەملەكەتتەرى ۇيىمى 2009 -جىلى ناحچىۆان كەلىسىمى نەگىزىندە قۇرىلعان. ونىڭ ماقساتى - تۇركىتىلدەس مەملەكەتتەر اراسىنداعى ساياسي، ەكونوميكالىق جانە مادەني ىنتىماقتاستىقتى نىعايتۋ. ۇيىمنىڭ باس كەڭسەسى ىستانبۇل قالاسىندا ورنالاسقان.
قىتاي مەن قازاقستان اراسىنداعى ساۋدا كولەمى ايتارلىقتاي ارتتى - حالىق گازەتى
قىتاي مەن قازاقستان اراسىنداعى ساۋدا كولەمى 2026 -جىلدىڭ ءبىرىنشى توقسانىندا 46,6 پايىزعا ءوسىپ، 13,243 ميلليارد ا ق ش دوللار بولدى. بۇل تۋرالى قىتاي باس كەدەن باسقارماسىنىڭ رەسمي دەرەكتەرىندە حابارلاندى.
مالىمەتكە سايكەس، وسى كەزەڭدە قىتايدىڭ قازاقستانعا ەكسپورتى 6,443 ميلليارد دوللارعا جەتىپ، 7,1 پايىزعا ارتقان. ال قازاقستاننان قىتايعا يمپورت كولەمى 6,8 ميلليارد دوللارعا جەتىپ، وتكەن جىلمەن سالىستىرعاندا 125,2 پايىزعا وسكەن.
ناۋرىز ايىنىڭ وزىندە ەكى ەل اراسىنداعى ساۋدا اينالىمى 3,4932 ميلليارد دوللار بولدى. ونىڭ ىشىندە قىتاي ەكسپورتى 1,9146 ميلليارد دوللار، ال قازاقستاننان يمپورت 1,5786 ميلليارد دوللار بولعان.
سونداي-اق 2025 -جىلى قىتاي مەن قازاقستان اراسىنداعى جالپى ساۋدا كولەمى 48,68 ميلليارد دوللارعا جەتىپ، 2024 -جىلمەن سالىستىرعاندا 11 پايىزعا ارتقانى اتالىپ ءوتتى.
الماتىدا پارسى تىلىنەن تىلدىك وليمپيادا ءوتتى - ParsToday
الماتى قالاسىندا پارسى تىلىنەن ءداستۇرلى تىلدىك وليمپيادا ءوتتى. ءبىلىم سايىسى جوعارى وقۋ ورىندارىنىڭ ستۋدەنتتەرى اراسىندا ۇيىمداستىرىلدى، دەپ جازدى ParsToday اقپارات اگەنتتىگى.
يراندىق ب ا ق- تىڭ مالىمەتىنشە، ءىس- شارانى قازاق ۇلتتىق قىزدار پەداگوگيكالىق ۋنيۆەرسيتەتىنىڭ شەتەل تىلدەرىن كاسىبي دايارلاۋ كافەدراسى يران يسلام رەسپۋبليكاسى باس كونسۋلدىعىنىڭ مادەني وكىلدىگىمەن بىرلەسىپ، عىلىم دەكاداسى اياسىندا وتكىزدى. وليمپيادا 2026 -جىلعى 22 -ساۋىردە ءوتتى.
وليمپياداعا پارسى ءتىلىن ەكىنشى شەتەل ءتىلى رەتىندە وقىپ جاتقان قازاق ۇلتتىق قىزدار پەداگوگيكالىق ۋنيۆەرسيتەتى مەن ءال-فارابي اتىنداعى قازۇۋ ماگيسترانتتارى قاتىستى. قاتىسۋشىلار تىلدىك ءبىلىمى مەن داعدىلارىن سىنعا سالدى.
Parstoday اقپارات اگەنتتىگىنىڭ حابارلاۋىنشا، اشىلۋ راسىمىندە ۋنيۆەرسيتەت پرورەكتورى ا. ت. كۋلساريەۆا ءسوز سويلەپ، بۇل ءىس- شارانىڭ تەك ءبىلىم سايىسى عانا ەمەس، مادەني بايلانىستاردى نىعايتاتىن ماڭىزدى الاڭ ەكەنىن اتاپ ءوتتى. سونداي- اق يراننىڭ باس كونسۋلى س. احمادي قاتىسۋشىلارعا ساتتىلىك تىلەدى.
قورىتىندىسىندا جەڭىمپازدارعا حالىقارالىق سەرتيفيكاتتار مەن ديپلومدار تابىستالعان.
تۇركيا قارجى ءمينيسترى جاھاندىق ەكونوميكاداعى تاۋەكەلدەر تۋرالى ەسكەرتتى - TRT
تۇركيا قارجى ءمينيسترى مەحمەت شيمشەك الەمدىك ەكونوميكانىڭ بۇرىن- سوڭدى بولماعان دەڭگەيدە بەلگىسىزدىككە تاپ بولعانىن مالىمدەدى.
ءمينيستردىڭ ايتۋىنشا، جاھاندىق دەڭگەيدە قاقتىعىستار مەن گەوساياسي شيەلەنىستەر كۇشەيىپ، بۇل ەكونوميكالىق ءوسىمنىڭ باياۋلاۋىنا اكەلۋى مۇمكىن. سونىمەن قاتار حالىقارالىق پروتەكتسيونيزم مەن ەكونوميكالىق بولشەكتەنۋ ءۇردىسى دە ارتىپ كەلەدى، دەپ حابارلادى تۇركيا راديو تەليەۆيزيا پورتالى.
اتالعان ب ا ق- تىڭ دەرەگىنشە، وسى سىن- قاتەرلەرگە جاۋاپ رەتىندە تۇركيا وڭىرلىك جانە جاھاندىق ساۋدا باعىتتارىن دامىتۋعا باسىمدىق بەرىپ وتىر. اتاپ ايتقاندا، باسرادان تۇركياعا دەيىن سوزىلاتىن «دامۋ جولى» جوباسى جۇزەگە اسىرىلىپ جاتىر. بۇل باستاما شامامەن 1200- 1250 شاقىرىمدى قامتيتىن تەمىرجول، اۆتوجول جانە ەنەرگەتيكالىق ءدالىزدى بىرىكتىرەدى.
جوباعا ءب ا ا، كاتار جانە يراك سەرىكتەس رەتىندە قاتىسىپ جاتىر. سونىمەن قاتار ورتا ءدالىز ازيا مەن ەۋروپانى بايلانىستىراتىن ماڭىزدى باعىتتاردىڭ ءبىرى رەتىندە قاراستىرىلىپ وتىر.
ءمينيستردىڭ مالىمەتىنشە، جوبالاردىڭ شامامەن 83 پايىزى حالىقارالىق قارجى ۇيىمدارى تاراپىنان قارجىلاندىرىلادى. بۇدان بولەك، تۇركيا ورتا ءدالىزدى دامىتۋ ماقساتىندا دۇنيەجۇزىلىك بانكپەن كەلىسىمگە قول قويعان.
سونداي- اق وسى اپتادا «TRT» - دا «تۇركيا 15 جاسقا تولماعان بالالارعا الەۋمەتتىك جەلىنى پايدالانۋعا تىيىم سالدى» دەگەن تاقىرىپتاعى اقپارات جارىق كوردى.
اتالعان باسىلىمنىڭ Anadolu اگەنتتىگىنە سىلتەمە جاساپ حابارالۋىنشا، تۇركيا 15 جاسقا تولماعان بالالاردىڭ الەۋمەتتىك جەلى پلاتفورمالارىن پايدالانۋىنا تىيىم سالاتىن جاڭا ەرەجەلەردى كۇشىنە ەنگىزدى، دەپ حابارلايدى Anadolu اگەنتتىگى.
جاڭا رەتتەۋلەر بالالار مەن جاسوسپىرىمدەردىڭ ونلاين قاۋىپسىزدىگىن كۇشەيتۋگە باعىتتالعان. قۇجاتقا سايكەس، 15 جاسقا دەيىنگى قولدانۋشىلار الەۋمەتتىك جەلىلەردە تىركەلە المايدى. ال پلاتفورمالار پايدالانۋشىلاردىڭ جاسىن راستاۋ جۇيەلەرىن ەنگىزۋگە مىندەتتى.
سونىمەن قاتار الەۋمەتتىك جەلى وپەراتورلارى 15 جاستان اسقان پايدالانۋشىلارعا جاس ەرەكشەلىگىنە ساي سارالانعان قىزمەت ۇسىنۋى ءتيىس. قۇجاتتا اتا-انالىق باقىلاۋ تەتىكتەرىن كۇشەيتۋ دە قاراستىرىلعان.
اتاپ ايتقاندا، اككاۋنت باپتاۋلارىن باسقارۋ جانە ەكران الدىندا وتكىزىلەتىن ۋاقىتتى شەكتەۋگە ارنالعان قۇرالدار ەنگىزىلەدى. بۇدان بولەك، كومپانيالار جاڭىلىستىراتىن جارنامانىڭ الدىن الىپ، زياندى كونتەنتتى جويۋ بويىنشا شارا قابىلداۋعا مىندەتتى.
ۇلتتىق قاۋىپسىزدىككە قاتىستى شۇعىل جاعدايلاردا ءىرى پلاتفورمالار كونتەنتتى الىپ تاستاۋ تۋرالى تالاپتاردى ءبىر ساعات ىشىندە ورىنداۋى كەرەك. سونداي-اق تاۋلىگىنە 10 ميلليوننان استام قولدانۋشىسى بار پلاتفورمالارعا قاتاڭ تالاپتار قويىلادى.
بەيسەن سۇلتان