الماتىدا المانىڭ سيرەك ءتۇرىن زەرتتەۋ جانە ساقتاۋمەن اينالىساتىن ورتالىق قۇرىلدى
الماتى. KAZINFORM - الماتىدا بوتانيكا جانە فيتوينترودۋكتسيا ينستيتۋتى جانىنان سيۆەرس الما اعاشىن زەرتتەۋ جانە ساقتاۋ ورتالىعى قۇرىلدى. بۇل تۋرالى مەگاپوليستىڭ باس بوتانيكالىق باعى حابارلادى.
بوتانيكالىق باقتىڭ مالىمەتىنە سايكەس، سيۆەرس الما اعاشى - ورتالىق ازيا مەن قازاقستانداعى تاۋ ەتەگىندەگى الما اعاشتارىنىڭ جابايى جەمىستى ءتۇرى. الما اعاشىنىڭ بۇل ءتۇرىنىڭ العاشقى سيپاتتاماسى (1793) بوتانيك يوگانن سيۆەرسكە تيەسىلى. د ن ق زەرتتەۋلەرىنە سايكەس، سيۆەرس الما اعاشى الما اعاشتارىنىڭ كوپتەگەن مادەني سورتىنىڭ اتاسى ەكەنى دالەلدەنگەن. سوندىقتان قازاقستان - المانىڭ وتانى دەپ تانىلدى.
- بوتانيكا جانە فيتوينترودۋكتسيا ينستيتۋتىنىڭ باس بوتانيكالىق باعىنىڭ اۋماعىندا تاۋ جەمىستى ورماندارىنىڭ تابيعي پوپۋلياتسيالارىنان ىرىكتەلىپ الىنعان 170-تەن استام ءپىشىندى كورسەتەتىن سيۆەرس الما اعاشىنىڭ بىرەگەي گەندىك قورى ساقتالعان. سيۆەرس الما اعاشى قازاقستاننىڭ قىزىل كىتابىنا (2014) ەنگەن جانە حالىقارالىق تابيعاتتى قورعاۋ وداعىنىڭ قورعاۋىندا. بوتانيكا جانە فيتوينترودۋكسيا ينستيتۋتىندا سيۆەرس الما اعاشىن زەرتتەپ، ساقتاۋمەن بىرنەشە زەرتحانا اينالىسادى. ونىڭ ىشىندە اكادەميك ايماق جانعاليەۆ قۇرعان ا. د. جانعاليەۆ اتىنداعى جەمىس وسىمدىكتەرىنىڭ گەنوفوندىن قورعاۋ جانە ينترودۋكسيالاۋ جونىندەگى مامانداندىرىلعان زەرتحاناسى بار، - دەپ حابارلادى بوتانيكالىق باقتىڭ باسپا ءسوز قىزمەتى.
ەسكە سالايىق، بۇعان دەيىن الماتىدا ءبىر اي بويى زەينەتكەرلەر بوتانيكالىق باققا تەگىن كىرە الاتىنىن جازعانبىز.
اۆتور
دوسبول اتاجان