الماتىدا العاشقى قار جاۋدى

الماتى. KAZINFORM - الماتىنىڭ جوعارى بولىگىندە قار جاۋىپ جاتىر. قالا تۇرعىندارى العاشقى قاردىڭ بەينەجازبالارىن الەۋمەتتىك جەلىلەردە ءبولىسىپ جاتىر.

الماتىدا جاۋعان جاۋىننىڭ ارتى قارعا ۇلاستى. الەۋمەتتىك جەلىدە مەدەۋدە جاۋعان قاردىڭ ۆيدەولارى پايدا بولدى.

«شىمبۇلاق» تاۋ-شاڭعى كۋرورتىنىڭ بازالىق بەكەتتەرىندە ورناتىلعان بەينەكامەرالاردان ورتا جانە جوعارعى بەتكەيلەردى قار باسىپ جاتقانىن كورۋگە بولادى.

تولاسسىز جاۋعان جاڭبىر سالدارىنان الماتى جولدارىندا كەپتەلىس. 2GIS كارتاسىنداعى اقپارات بويىنشا، ساعات 15:30-دا جول كەپتەلىسى 8 بالعا باعالاندى. اسىرەسە، نازاربايەۆ، رىسقۇلوۆ، رايىمبەك، اباي داڭعىلدارىنىڭ ۋچاسكەلەرىندە بايقالادى.

«قازگيدرومەت» ر م ك مالىمەتىنشە، الماتىدا تۇندە اۋا تەمپەراتۋراسى - 2 گرادۋسقا دەيىن تومەندەيدى.

بۇعان دەيىن جاڭبىرعا بايلانىستى كوممۋنالدىق قىزمەت كۇشەيتىلگەن رەجيمگە كوشكەنى تۋرالى جازعان بولاتىنبىز. قالا بيلىگى اۆتوموبيل جۇرگىزۋشىلەرىنە دوڭگەلەكتى اۋىستىرۋعا ەسكەرتۋ جاسادى.

«جولداعى قاۋىپسىزدىكتى قامتاماسىز ەتۋ ماقساتىندا اۆتوكولىك جۇرگىزۋشىلەرىنە جازعى دوڭگەلەكتەرىن قىسقى دوڭگەلەككە ۋاقتىلى اۋىستىرۋدى ۇسىنامىز. جولدا كوكتايعاق ءارى قوزعالىس بولىگىندە تايعاناق قابىرشىقتاردىڭ پايدا بولۋىنا بايلانىستى جۇرگىزۋشىلەر قوزعالىس جىلدامدىعىن تومەندەتىپ، اۆتوموبيلدەر اراسىنداعى قاشىقتىقتى ارتتىرىپ، كەنەتتەن مانيەۆر جاساۋدان، تەجەگىشتى كىلت باسۋدان اۋلاق بولعانى ءجون»، - دەلىنگەن حابارلامادا.

الماتىنىڭ كوممۋنالدىق قىزمەتتەرى كوكتايعاققا قارسى جۇمىستاردى جەدەل جۇرگىزۋگە دايىن. بۇل جۇمىسقا 10 مەردىگەر ۇيىم، 841 تەحنيكا جانە 1405 جۇمىسشىسى جۇمىلدىرىلدى. كوكتايعاققا قارسى 76 توننا ماتەريال دايىندالدى.

اۆتور
الما مۇقانوۆا