الماتىدا اباي داڭعىلىن ۇزارتۋ جۇمىستارى اياقتالدى

الماتى. KAZINFORM - اباي داڭعىلىنىڭ قالا شەكاراسىنا دەيىنگى ۇزارعان بولىگىندە قوزعالىس اشىلدى. الماتى قالالىق موبيلدىلىك باسقارماسىنان ءمالىم ەتكەندەي، سترويتەلنايا كوشەسىنەن قالا شەكاراسىنا دەيىنگى سوڭعى 600 مەتر جولدىڭ بويىنداعى جۇمىس اياقتالدى.

- قازىر جولدىڭ ەكى جاعىندا جاياۋ جۇرگىنشىلەر جولى، ۆەلوجولدار، قوسىمشا جولدار جانە ىرگەلەس اۋماقتى كوركەيتۋ جۇمىستارى قولعا الىندى. اباي داڭعىلىنىڭ ب. مومىش ۇلى كوشەسىنەن باستالاتىن ۇزارعان بولىگىنىڭ جالپى ۇزىندىعى - 5,3 شاقىرىم. بۇل باعىتتا التى جولاقتى جول، قارعالى وزەنىندەگى كوپىر، ءاشىموۆ كوشەسىمەن قيىلىساتىن جولايىرىق، 6 جەر ءۇستى جاياۋ جۇرگىنشىلەر وتكەلى جانە 4 باعدارشام نىسانى سالىندى، - دەپ اتاپ ءوتتى باسقارمادان.

ايتا كەتەيىك، قازىر موڭكە بي كوشەسىندە ۇزارتۋ جۇمىستارى اياقتالدى. رىسقۇلوۆ داڭعىلى، ساين كوشەسى، سولتۇستىك اينالما جولى جانە تىلەنديەۆ كوشەسىن ۇزارتۋ جۇمىستارى جالعاسىپ جاتىر.

وسىعان دەيىن الماتىنىڭ اباي، تولە بي، جۇبانوۆ كوشەلەرىن ۇزارتۋ جۇمىستارى قاشان اياقتالاتىنى تۋرالى حابارلاعان ەدىك.

ەسكە سالايىق، بۇعان دەيىن الماتىدا كوشەلەردى ۇزارتۋ ءۇشىن 35 ميلليارد تەڭگەگە جەر ۋچاسكەلەرى ساتىپ الىنعانىن جازعانبىز.

اۆتور

الما مۇقانوۆا