الماتىدا 40 قاباتتى ءزاۋلىم عيمارات سالىنادى
استانا. قازاقپارات - الماتىدا Rams Beyond Almaty كەشەنى سالىنادى. جاڭا عيمارات شاھاردىڭ ساۋلەتتىك سيمۆولىنا اينالماق. بىرەگەي جوبانىڭ تانىستىرىلىمىنا تانىمال تۇرىك اكتەرى بۋراك ءوزچيۆيت قاتىستى.
كورەرمەنگە «عاجايىپ عاسىر»، «وسمان» جانە «شەكسىز ماحاببات» سىندى تەلەحيكايالار ارقىلى تانىمال اكتەر، Rams Beyond Almaty جوباسىنىڭ رەسمي امباسسادورى اتاندى. Rams Beyond Almaty - شاھارداعى ەڭ بيىك ءارى ءساندى كەشەن بولماق. العاشقى 40 قاباتتى ءزاۋلىم عيماراتتا پاتەرلەر، كوممەرتسيالىق كەڭسەلەر، سپورت پەن دەمالىس ايماعى جانە 5 جۇلدىزدى قوناق ءۇي بولادى.
اسپانمەن تالاسقان جوبانىڭ امباسسادورى بۋراك ءوزچيۆيتتىڭ ايتۋىنشا، بۇل جاي عانا بيىك عيمارات ەمەس، ءومىر سۇرۋگە ىڭعايلى جانە زاماناۋي كەڭىستىك. پرەميۋم ساناتتاعى كەشەندە جانعا جايلى جاعدايدىڭ بارلىعى جاسالادى.
بۋراك ءوزچيۆيت، Rams Beyond Almaty جوباسىنىڭ امباسسادورى:
- Rams كومپانياسىن 10 جىلدان بەرى بىلەمىن. قازاقستان مەن تۇركيادا Rams كومپانياسىن بىلمەۋ مۇمكىن ەمەس. ماعان بۇل كومپانيانىڭ ىسكە اسىرعان جوبالارى ۇنايدى. ءارقاشان جاڭا ديزاين، جاڭا فورماتتا جۇمىس ىستەيدى.
Rams Beyond Almaty-عا 500 ميلليون دوللار ينۆەستيتسيا سالىنادى. قۇرىلىس بارىسىندا 1800 ادام جۇمىسپەن قامتىلادى. ال نىسان تولىق ىسكە قوسىلعان سوڭ 2500 ادامعا تۇراقتى جۇمىس ورنى اشىلادى. 4 جىلدا سالىناتىن كەشەن جاڭبىر سۋىن جيناۋ جۇيەسى، كۇن پانەلدەرى، بەينەباقىلاۋ جانە بەت-الپەتتى تانۋ سىندى زاماناۋي تەحنولوگيامەن جابدىقتالادى.
حارۋن رەشيت كۋتلۋاي، Rams Beyond almaty قۇرىلىس جوباسىنىڭ كوورديناتورى:
- بۇل جوبادا حالىقارالىق تاجىريبەلى ۇيىمدارمەن جۇمىس ىستەيمىز. قاۋىپسىزدىك ماسەلەسىنە كانادالىق، تۇركيالىق كومپانيالار قاتىسادى. الماتىنىڭ سەيسميكالىق احۋالىنا قاراي وتىرىپ، قاۋىپسىزدىككە باسار نازار اۋدارامىز.
جوسپار بويىنشا Rams Beyond Almaty كۇنىنە 25 مىڭ ادام قابىلداي الادى. 40 قاباتتى عيمارات تيميريازيەۆ- سەيفۋللين كوشەسىنىڭ قيىلىسىندا بوي كوتەرەدى. 4,7 گەكتاردىڭ 2,5 گەكتارى كوگالدى اۋماققا اينالادى. كوك تىرەگەن بيىك عيمارات 2030 -جىلعا قاراي قولدانىسقا بەرىلمەك.
24.kz