الماتىدا 4 مىڭعا جۋىق شەتەل ازاماتى كوشى-قون زاڭناماسىن بۇزعان
الماتى. KAZINFORM - الماتىدا ق ر كوشى-قون زاڭناماسىن بۇزۋدى انىقتاۋ جانە جولىن كەسۋ ماقساتىندا جەدەل-پروفيلاكتيكالىق ءىس-شارالار ءوتىپ جاتىر.
الماتى قالالىق پوليتسيا دەپارتامەنتىنىڭ كوشى-قون قىزمەتىنىڭ مالىمەتىنشە، جىل باسىنان بەرى قالاعا 23 مىڭعا جۋىق شەتەلدىك كەلگەن.
- الماتى - ينفراقۇرىلىمى دامىعان، وزىندىك مادەنيەتى بار شاھار، سوندىقتان الىس، جاقىن ەلدەردەن كەلگەن شەتەلدىكتەردىڭ قىزىعۋشىلىعىن وياتادى. كوشى قون اعىنى جىل سايىن ارتىپ كەلەدى. بۇل ەكونوميكاعا وڭ اسەرىن تيگىزسە دە، قىلمىستىق جاعدايعا كەرى اسەرىن تيگىزىپ جاتىر. ياعني، قۇقىق بۇزۋشىلىق سانى ءوسىپ كەلەدى. اۋىر قىلمىس تىركەلۋدە. ماسەلەن، الماتىنىڭ تۇركسىب اۋدانىندا شەتەل ازاماتى ءوزىنىڭ تانىسىن ولتىرگەن. ال مەدەۋ اۋدانىندا ءۇندىستان مەن پاكىستاننىڭ ەكى ازاماتى سينتەتيكالىق ەسىرتكى شىعاراتىن زەرتحانا ۇيىمداستىرعان. شەتەلدىك ستۋدەنتتەردىڭ قاتىسۋىمەن بولاتىن توبەلەستەر دە كوپتەپ كەزدەسەدى، - دەدى الماتى قالالىق پوليتسيا دەپارتامەنتىنىڭ كوشى-قون قىزمەتى باسقارماسىنىڭ باستىعى اسحات بۋتۋنچينوۆ.
ونىڭ ايتۋىنشا، الماتىدا ق ر كوشى-قون زاڭناماسىن بۇزۋشىلىقتاردى انىقتاۋ جانە جولىن كەسۋ ماقساتىندا تۇراقتى تۇردە جەدەل-پروفيلاكتيكالىق ءىس-شارالار ءوتىپ كەلەدى. مىسالى، جىل باسىنان بەرى قازاقستاننىڭ كوشى-قون زاڭناماسىن بۇزعان 8 مىڭنان استام ادام اكىمشىلىك جاۋاپقا تارتىلسا، ونىڭ 4 مىڭعا جۋىعى شەتەلدىكتەر. جالپى، سوت شەشىمىمەن 682 شەتەلدىك ەلدەن شىعارىلدى. وسىعان بايلانىستى الماتى پوليتسياسى ەلگە كەلەتىن شەتەل ازاماتتارىنا ق ر زاڭناماسىن قاتاڭ ساقتاۋ قاجەتتىگىن ەسكە سالدى.
بۇعان دەيىن الماتىدا زاڭسىز جۇرگەن افريكانىڭ 15 ازاماتى ەلدەن شىعارىلعانىن جازعانبىز.
سونداي-اق الماتىدا ەسىرتكى دايىنداپ، تاراتقان پاكىستان، ءۇندىستان ازاماتتارى ۇستالعان بولاتىن.