الماتىدا 17-قىركۇيەك كۇنى ورتالىق ازياداعى ەڭ ءىرى كورمە باستالادى

الماتى. قازاقپارات - 17- قىركۇيەك كۇنى الماتى ورتالىق ازياداعى تاۋ- كەن مەتاللۋرگيا يندۋسترياسىنىڭ ورتالىعىنا اينالادى. مۇندا وڭىردەگى ەڭ اۋقىمدى كورمە - Mining Metals Central Asia 2025 ءوز جۇمىسىن باستايدى. 

كورمەگە 30 ەلدەن 515 كومپانيا قاتىسىپ، مىنا باعىتتار بويىنشا زاماناۋي جابدىقتار مەن تەحنولوگيالاردى ۇسىنادى:
اشىق جانە جەراستى كەن جۇمىستارى؛
رۋدالاردى بايىتۋ، مەتاللۋرگيا جانە مەتال وڭدەۋ؛
تالداۋ جانە زەرتحانالىق زەرتتەۋلەر؛
گەولوگيالىق بارلاۋ؛
ونەركاسىپتىك قاۋىپسىزدىك؛
ارنايى باعدارلامالىق قامتاماسىز ەتۋ.
ءىس- شارا 17-19- قىركۇيەك ارالىعىندا «اتاكەنت» كورمە ورتالىعىندا وتەدى. ەكسپوزيتسيا 8، 9، 10، 11-پاۆيلونداردا جانە كوشە الاڭىندا ورنالاسادى. كورمەگە تەگىن بيلەت الۋ ءۇشىن mining-metals.kz سايتىندا MMC2025MPS پروموكودىن قولدانۋعا بولادى.

سونىمەن قاتار «جول جانە ونەركاسىپتىك قۇرىلىس، كوممۋنالدىق تەحنيكا» - KAZCOMAK 2025 كورمەسى ۇيىمداستىرىلادى.

ىسكەرلىك باعدارلاما اياسىندا ەكى كۇن بويى تاۋ-كەن مەتاللۋرگيا كەشەنىنىڭ بولاشاعىنا قاتىستى نەگىزگى پىكىرتالاستار وتەدى. وندا ينۆەستيتسيالار، سيفرلاندىرۋ، لوگيستيكا جانە حالىقارالىق ارىپتەستىك ماسەلەلەرى تالقىلانادى. ساراپشىلار تۇراقتى دامۋ مەن سالانىڭ ترانسفورماتسياسىنا نازار اۋدارسا، CiDRA ،Epiroc ،NLT Europe ،Proftec ،Sandvik كومپانيالارى تيىمدىلىك پەن قاۋىپسىزدىكتى ارتتىرۋعا ارنالعان پراكتيكالىق شەشىمدەرىن تانىستىرادى.

كورمە بارىسىندا يننوۆاتسيالارعا دا ايرىقشا كوڭىل بولىنەدى. Kcell Demo Day اياسىندا IoT ،5G، جاساندى ينتەللەكت پەن كيبەرقاۋىپسىزدىك سالاسىنداعى جاڭا جوبالار ۇسىنىلادى.

ال «كومپوزيت» كومپانياسى توزۋعا قارسى قورعاۋ تەحنولوگياسىنا ارنالعان جابىق سەمينار وتكىزەدى.

حالىقارالىق تاجىريبەنى ۇلى بريتانيا ەلشىلىگى مەن گەرمانيا قاۋىمداستىعى ۇسىنادى.

ايتا كەتەيىك، EXPO 2025 Osaka كورمەسىندەگى قازاقستان پاۆيلونى ميلليونىنشى مەيمانىن قارسى الدى.