الماتىدا 1-مامىر مەرەكەسى قالاي تويلانادى

الماتى. KAZINFORM - الماتىدا 1-مامىر - قازاقستان حالقىنىڭ بىرلىگى كۇنىنە ارنالعان نەگىزگى مەرەكەلىك ءىس- شارالار «رەسپۋبليكا سارايى» الدىنداعى اباي الاڭىندا وتەدى.

الماتى اكىمدىگىنىڭ مالىمەتىنشە، بيىل مەرەكە قازاقستان حالقى اسسامبلەياسىنىڭ 30 جىلدىعىنا ورايلاستىرىلىپ، «بىرلىگى جاراسقان الماتى» دەگەن اتپەن وتەدى.

11:00 دەن 12:15 كە دەيىن باس ساحنادا ەلىمىزدىڭ ەتنيكالىق جانە مادەني ارتۇرلىلىگىن تانىستىراتىن قازاقستاندىق ورىنداۋشىلار مەن شىعارماشىلىق ۇجىمدار ونەر كورسەتەدى.

جينالعاندار ۆوكالدى جانە اسپاپتىق شىعارمالار، حالىق جانە زاماناۋي بيلەر، سونداي-اق ءتۇرلى مادەنيەتارالىق پوپۋرريگە كۋا بولادى.

الماتىلىقتار مەن قالا قوناقتارىنا ارناپ L Duo ءدۋەتى، دارىندى پيانيست تەمىرلان بەيسەنباي (Ratovich)، «Diamond» سترۋندى تريوسى، دۋدۋكيست مەيىرمان ابدراحمان ۇلى، «دەرۆيشي»، «Made in KZ» توپتارى، سونداي-اق باشقۇرتستاننان كەلگەن «Ay Yola» توبى، ولار وزدەرىنىڭ تانىمال «Homay» كومپوزيتسياسىن ورىندايدى. كۇندىزگى كونسەرتتىك باعدارلامانى قازاقستاننىڭ حالىق ءارتيسى روزا رىمبايەۆا اياقتايدى.

12:15 تەن 16:00 گە دەيىن مەرەكەلىك كونسەرت ەتنومادەني بىرلەستىكتەردىڭ شىعارماشىلىق ۇجىمدارىنىڭ ونەر كورسەتۋىمەن جالعاسادى. كورەرمەندەر حالىق بيلەرىن، فلەشموبتى، حالىق اندەرى مەن ەتنيكالىق مۋزىكالىق كومپوزيتسيالاردى تاماشالايدى.

كەشكە اباي الاڭىندا الماتىلىقتاردى جانە مەگاپوليس قوناقتارىن قازاقستان ەستراداسىنىڭ جۇلدىزدارىمەن ۇلكەن شوۋ-كونسەرت كۇتىپ تۇر.

كەشتىڭ باستى جۇلدىزى - تانىمال ءانشى ايقىن تولەپبەرگەن. سونىمەن قاتار ساحناعا انىمەن كوپشىلىكتىڭ جۇرەگىن جاۋلاعان بۇركىت، مارسەل، دۋمان مارات جانە مارحابا ءسابي شىعادى.

كورەرمەندەردى قىزىقتى شوۋ- باعدارلاما، جاندى دىبىس جانە جارقىن اتموسفەرا كۇتەدى. باستالۋى - 19:00.

سونىمەن قاتار، اباي الاڭىندا «ەدينستۆو نارودا ۆ فوكۋسە» فوتوكورمەسى وتەدى، وندا كەلۋشىلەر قازاقستان حالقى اسسامبلەياسىنىڭ تاريحىنداعى ساۋلەلى ساتتەردى كورە الادى.

بۇعان قوسا، 1-مامىردا ساعات 10:00 دە تۇڭعىش پرەزيدەنت پاركىندەگى بىرلىك جارىسى ءوتىپ، وعان 300 ادام قاتىسادى. جارىس قازاقستان حالقى اسسامبلەياسىنىڭ 30 جىلدىعى مەن قازاقستان حالقىنىڭ بىرلىگى كۇنىنە ارنالادى.

مەرەكەلىك شارالار قالانىڭ باسقا اۋداندارىندا دا وتەدى:

- اۋەزوۆ اۋدانىندا 30-ساۋىردە ساعات 11:00 دە Family park تا «قازاقستان - بىرلىك پەن تاتۋلىقتىڭ مەكەنى» اتتى ەتنو-كونسەرت وتەدى؛

- الاتاۋ اۋدانىندا مەرەكەلىك كونسەرت 30-ساۋىردە ساعات 15:00 دە يننوۆاتسيالىق شىعارماشىلىق ورتالىعىندا وتەدى، مەكەنجايى: نۇركەنت شاعىن اۋدانى، 14ا؛

- المالى اۋدانىندا مەرەكەلىك كونسەرت 1-مامىردا ساعات 12:00 دە م. گاندي اتىنداعى ساياباقتا ۇيىمداستىرىلادى؛

- بوستاندىق اۋدانىندا 1-مامىردا ساعات 12:00 دە «اتاكەنت» ق ءى ءى و اركاسى الدىنداعى الاڭدا مەرەكەلىك شارا وتەدى؛

- جەتىسۋ اۋدانىندا 1-مامىردا ساعات 11:00 دە ارباتتا (اينابۇلاق شاعىن اۋدانى) تۇرعىندار ءۇشىن مەرەكەلىك ويىن- ساۋىق شارالارى ۇيىمداستىرىلادى. قوناقتار سپورتتىق جارىستار، ينتەراكتيۆتى ويىندار جانە انيماتورلار مەن بوي كوتەرگەن قۋىرشاقتاردىڭ قاتىسۋىمەن ءتۇرلى باعدارلامالار كۇتەدى؛

- مەدەۋ اۋدانىندا 1- مامىردا ساعات 12:00 دە ورتالىق مادەنيەت جانە دەمالىس پاركىنىڭ اشىق ساحناسىندا مەرەكەلىك ءىس-شارا وتەدى؛

- ناۋرىزباي اۋدانىندا مەرەكەلىك كونسەرت 1-مامىردا ساعات 11:00 دە امفيتەاتردا وتەدى، مەكەنجايى: شۇعىلا شاعىن اۋدانى، 347؛

- تۇركسىب اۋدانىندا مەرەكەلىك كونسەرت 1-مامىردا ساعات 11:00 دە №6 مەكتەپ ءۇيى اۋماعىندا وتەدى، مەكەنجايى: سەيفۋللين داڭعىلى، 13/1.

وسىعان دەيىن، قازاقستاندىقتار مامىر ايىندا نەشە كۇن دەمالاتىنى تۋرالى جازعان ەدىك.