الماتىعا كەلگەن شەتەلدىك تۋريستەر قايتادان تۋريستىك جارنا تولەۋى مۇمكىن

الماتى. KAZINFORM - الماتىدا شەتەلدىك تۋريستەرگە ارنالعان جارنا قايتادان ەنگىزىلۋى مۇمكىن. بۇل تۋرالى الماتى قالاسىنىڭ ءماسليحاتى حابارلادى.

2022 -جىلى ەلىمىزدىڭ اۋماعىندا شەتەلدىكتەرگە ارنالعان تۋريستىك جارنا ەنگىزىلگەن بولاتىن. ونىڭ نەگىزىندە الماتى قالاسىنىڭ ءماسليحاتى 2023 -جىلدىڭ 15-قىركۇيەگىندە شاھارعا ساياحاتتاپ كەلگەن شەتەلدىك تۋريستەر 0,5 ا ە ك (1846 تەڭگە) كولەمىندە جارنا تولەۋدى مىندەتتەگەن.

قالالىق تۋريزم باسقارماسىنىڭ مالىمەتىنە سايكەس، 2023 -جىلدىڭ 17-قاڭتارى مەن وسى جىلدىڭ 1-اقپانىنا دەيىن بيۋدجەتكە 650 ميلليون تەڭگە تابىس تۇسكەن.

الايدا ق ر تۋريزم جانە سپورت ءمينيسترىنىڭ 2023 -جىلدىڭ 27-جەلتوقسانىنداعى № 347 بۇيرىعىمەن قازاقستاننىڭ بۇكىل اۋماعىندا نولدىك ستاۆكانى بەكىتىلدى جانە 2024 -جىلى 21-اقپان كۇنى الماتى ءماسليحاتى شەتەلدىك تۋريستەر ءۇشىن جارنا قۇنىن 0 تەڭگەگە وزگەرتتى.

كەزەكتەن تىس XIV سەسسيا بارىسىندا دەپۋتاتتار الماتى قالاسىنىڭ ەرەكشە مارتەبەسىن پايدالانا وتىرىپ، شەتەلدىك تۋريستەرگە ارنالعان جارنانى مەگاپوليس ءۇشىن قايتا قاراۋ كەرەك ەكەنىن اتاپ وتكەن بولاتىن.

- ءبىز بۇل ەرەجەنى قىركۇيەكتە قابىلداپ، ەندى ونى توقتاتىپ جاتىرمىز. نەگە ءبىز ءوز ەركىمىزبەن بيۋدجەتكە تۇسەتىن قارجىدان ايىرىلۋىمىز كەرەك دەگەن سۇراق تا ورىندى. ەندى كوميسسيامەن ءبىر شەشىمگە كەلدىك، ءمينيستردىڭ اتىنا دەپۋتاتتىق ساۋال جولدايمىز. مينيسترلىك ءبىزدىڭ ساۋالىمىزعا وڭ جاۋاپ بەرگەن جاعدايدا، بۇل سۇراققا قايتىپ كەلەمىز. الماتى قالاسىنا ەرەكشە مارتەبە بەرىلدى، سونى قولدانۋىمىز كەرەك. قالانىڭ پايداسىن ەسكەرۋ قاجەت، ويتكەنى كەيدە باسقا وڭىرلەر مەن الماتىنىڭ ماقسات- مۇددەلەرى كەلىسپەۋى مۇمكىن، - دەدى الماتى قالاسى ءماسليحاتىنىڭ دەپۋتاتى جانە كاسىپكەرلىك، ينسۆەستيتسيالار، تۋريزم جانە ەكولوگيا جونىندەگى تۇراقتى كوميسسياسىنىڭ ءتوراعاسى رۋسلان يدريسوۆ.

وسى ورايدا Kazinform ءتىلشىسى الماتى ءماسليحاتىنا ساۋال جولداپ، تۋريستىك جارنانىڭ قايتارىلۋى تۋرالى سۇرادى.

- وسى جىلدىن ءساۋىر ايىندا قازاقستان رەسپۋبليكاسى تۋريزم جانە سپورت مينيسترلىگىنە تۋريستىك جارنانىڭ ەسەپتىك ستاۆكالارىن جانە تىكەلەي ستاۆكالاردى ايقىنداۋ جونىندەگى قاعيدالاردى ءوز بەتىنشە بەكىتۋ بويىنشا جەرگىلىكتى وكىلدى ورگاننىڭ قۇزىرەتىن بەرۋ بولىگىندە الماتى قالاسىنىڭ ءماسليحاتى تاراپىنان ۇسىنىس جاساعانىن حابارلايدى. قازىرگى ۋاقىتتا اتالعان ۇسىنىس مينيسترلىكتىڭ قاراۋىندا، - دەلىنگەن ءماسليحات جاۋابىندا.

تۋريزم جانە سپورت مينيسترلىگىندە تۋريستىك جارنانىڭ مولشەرلەمەسىن جىلىنا 2 رەت وزگەرتۋگە مۇمكىندىك بار ەكەنىن ناقتىلاپ ءوتتى.

- قازاقستان رەسپۋبليكاسى مادەنيەت جانە سپورت ءمينيسترىنىڭ 2023 -جىلعى 14 شىلدەدەگى № 181 بۇيرىعىمەن شەتەلدىكتەر ءۇشىن تۋريستىك جارنانى تولەۋ قاعيدالارى بەكىتىلدى. تۋريستىك جارنا مولشەرلەمەلەرىن جەرگىلىكتى اتقارۋشى ورگان وسى قاعيدالاردىڭ نەگىزىندە ازىرلەيدى جانە ءتيىستى ءماسليحاتقا بەكىتۋگە ۇسىنادى. وسى قاعيدالاردىڭ 5-تارماعىندا بەلگىلەنگەن مولشەرلەر شەگىندە، ءبىراق جىلىنا ەكى رەتتەن ءجيى ەمەس، ماۋسىمدىققا بايلانىستى تۋريستىك جارنا مولشەرلەمەلەرىنىڭ مولشەرىن وزگەرتۋگە رۇقسات بەرىلەدى. شەتەلدىكتەر ءۇشىن تۋريستىك جارنا رەسپۋبليكالىق ماڭىزى بار قالا، استانا جانە اۋداندار (وبلىستىق ماڭىزى بار قالا) بيۋدجەتتەرى ءۇشىن سالىقتىق ەمەس تۇسىمدەر، - دەپ حابارلادى ق ر تۋريزم جانە سپورت مينيسترلىگىنەن.

ەسكە سالايىق، بۇعان دەيىن شەتەلدىك تۋريستەر قاراجاتىنىڭ 50 پايىزىن جاتىن ورىنعا جۇمسايتىنىن جازعانبىز.

اۆتور

الما مۇقانوۆا