الماتىعا جەننيفەر لوپەستىڭ كونسەرتىن تاماشالاۋعا 29 ەلدەن كورەرمەن كەلەدى
الماتى. قازاقپارات - 10-تامىز كۇنى الماتىنىڭ ورتالىق ستاديونىندا الەمگە تانىمال جۇلدىز جەننيفەر لوپەس ونەر كورسەتەدى.
ۇيىمداستىرۋشىلاردىڭ ايتۋىنشا، بۇل اۋقىمدى ءىس-شارا قالانىڭ جانە تۋريستىك سالانىڭ دامۋىنا ەلەۋلى ۇلەس قوسادى.
«استانا كونسەرت» كومپانياسىنىڭ پروديۋسەرى مالىك حاسەنوۆتىڭ سوزىنشە، كونسەرت حالىقارالىق دەڭگەيدە ۇلكەن قىزىعۋشىلىق تۋدىردى - بيلەتتەردى رەسەي، قىرعىزستان، وزبەكستان، تاجىكستان، ا ق ش، ۇلى بريتانيا، گەرمانيا، ب ا ءا، ساۋد ارابياسى، شۆەيتساريا، قىتاي، تۇركيا، مەكسيكا جانە باسقا ەلدەردى قوسا العاندا، 29 ەلدىڭ تۇرعىندارى ساتىپ الدى.
- بۇل ەلدەگى ەڭ تارتىمدى تۋريستىك قالالاردىڭ ءبىرى - الماتى ءۇشىن ماڭىزدى وقيعا جانە تۋريزمىنىڭ درايۆەرى، - دەدى مالىك حاسەنوۆ.
ونىڭ ايتۋىنشا، بيلەتتەردىڭ 30 پايىزىن (شامامەن 8000 ادام) شەتەلدىكتەر ساتىپ العان. الماتى قالاسىنىڭ تۋريزم باسقارماسىنىڭ زەرتتەۋىنە سايكەس، ءاربىر شەتەلدىك تۋريست قالادا ورتا ەسەپپەن 3 تەن 5 كۇنگە دەيىن بولىپ، جالپى 1500 ا ق ش دوللار كولەمىندە قاراجات جۇمسايدى.
- ەگەر 8 مىڭ تۋريست ءبىر مەزەتتە كەلىپ، وسى سومانى جۇمساسا، قوناق ۇيلەر، مەيرامحانالار، ءدامحانالار، ەكسكۋرسيالار مەن اۋە بيلەتتەرى ارقىلى قالا ەكونوميكاسىنا تۇسەتىن تابىس شامامەن بەس ميلليارد تەڭگەگە جەتەدى، - دەپ اتاپ ءوتتى ول.
پروديۋسەر بيلەت قۇنى قالاي قالىپتاساتىنىن جانە نەگە مۇنداي دەڭگەيدەگى ءىس-شارا ءۇشىن بۇل باعانىڭ قولجەتىمدى ەكەنىن دە ءتۇسىندىردى. باعالار 40 مىڭنان 180 مىڭ تەڭگەگە دەيىنگى ارالىقتا، سونىڭ ىشىندە ەڭ قىمبات ورىندار ساتىلىپ كەتتى. بيلەت باعاسىنىڭ ورتاشا قۇنى - 90 مىڭ تەڭگە.
- باعالار كونسەرتتىك تۋردىڭ وزىندىك قۇنىنا بايلانىستى ەسەپتەلەدى. بۇل - 14 ەلدە وتەتىن اۋقىمدى الەمدىك تۋر. ءاربىر باعا تۋر- مەنەدجەرمەن كەلىسىلگەن. ەڭ باستىسى، بۇل جوبادا مەملەكەتتىك بيۋدجەتتەن بىردە-ءبىر تەڭگە جۇمسالعان جوق - بۇل تولىعىمەن كوممەرتسيالىق شارا، بارلىق سالىق تولەنەدى، - دەدى سپيكەر.
سونداي-اق ول استانادا بارلىق بيلەت نەبارى ءۇش ساعات ىشىندە ساتىلىپ كەتكەنىن تىلگە تيەك ەتتى. الماتىدا قازىر شامامەن 2500- 3000 بيلەت قالدى - ولار تۇرىپ تاماشالايتىن ورىندار، فان-ايماق پەن ءبي الاڭى.
- بۇل قازاقستان نارىعى الەمدىك دەڭگەيدەگى شارالاردى وتكىزۋگە دايىن ءارى جەتىلگەنىن كورسەتەدى، - دەپ قورىتىندىلادى ءسوزىن سپيكەر.
جەننيفەر لوپەستىڭ كونسەرتى الماتى قالاسىنا ايتارلىقتاي ەكونوميكالىق پايدا اكەلەدى. تەك سالىق تۇسىمدەرىنىڭ وزىنەن قالالىق بيۋدجەتكە شامامەن 400 ميلليون تەڭگە تۇسەدى دەپ كۇتىلىپ وتىر.
«First Media Group» كومپانياسىنىڭ باسشىسى الفيا نۇرعۇماروۆانىڭ ايتۋىنشا، الماتى ءۇشىن بارلىعى 25 مىڭ بيلەت قاراستىرىلعان.
ەسكە سالايىق، بۇعان دەيىن پروديۋسەر مالىك حاسەنوۆ جەننيفەر لوپەس 10-تامىز كۇنى الماتىنىڭ ورتالىق ستاديونىندا جەكە كونسەرتىن وتكىزەتىنىن ايتقان ەدى.
كەيىن «قايرات» فۋتبول كلۋبى بۇل ءىس-شاراعا كەلىسىم بەرمەگەنىن حابارلادى.
ارتىنشا، الماتىدا 10-تامىزدا «قايرات» - «جەڭىس» ويىنى ەمەس، دجەي لونىڭ كونسەرتى وتەتىنى بەلگىلى بولدى.
ايتا كەتەيىك، امەريكالىق اكتريسا جانە ءانشى جەننيفەر لوپەس تۋر اياسىندا قازاقستاندا ەكى كونسەرت وتكىزەدى.