الماتى پوليتسەيلەرى جۇرگىزۋشىلەرگە ەسكەرتۋ جاسادى

الماتى. KAZINFORM - الماتى پوليتسەيلەرى كولىك جۇرگىزۋشىلەرىنە قىسقى دوڭگەلەككە اۋىسۋ قاجەتتىگىن ەسكەرتتى.

«الداعى كۇندەرى كۇن بۇزىلىپ، جاڭبىر مەن قار جاۋۋى، سونداي-اق اۋا تەمپەراتۋراسىنىڭ تومەندەۋى مۇمكىن. وسىعان وراي، جول قوزعالىسى قاۋىپسىزدىگىن ساقتاۋ ءۇشىن كولىك جۇرگىزۋشىلەرى مەن اۆتوكولىك يەلەرىنە دوڭگەلەكتەرىن قىسقى كەزەڭگە اۋىستىرۋدى الدىن الا جوسپارلاۋدى ۇسىنامىز»، - دەدى پوليتسيا دەپارتامەنتى اكىمشىلىك پوليتسيا باسقارماسىنىڭ باستىعى اسحات قۇلبايەۆ.

سونىمەن قاتار، ول 1-جەلتوقسان باستاپ، دوڭگەلەگىن اۋىستىرماعان جۇرگىزۋشىلەرگە ايىپپۇل سالىناتىنىن ەسكە سالدى. ەرەجە بۇزعاندار اكىمشىلىك كودەكستىڭ 590-بابى 5-بولىگى بويىنشا 5 ا ە ك كولەمىندە ايىپپۇل تولەيدى.

وسىعان دەيىن كۇننىڭ سۋىتۋىنا بايلانىستى الماتىنىڭ كوممۋنالدىق قىزمەتى كۇشەيتىلگەن جۇمىس رەجيمىنە كوشكەنى تۋرالى جازعان ەدىك.

الماتىنىڭ كوممۋنالدىق قىزمەتتەرى كوكتايعاققا قارسى جۇمىستاردى جەدەل جۇرگىزۋگە دايىن. بۇل جۇمىسقا 10 مەردىگەر ۇيىم، 841 تەحنيكا جانە 1405 جۇمىسشىسى جۇمىلدىرىلدى. كوكتايعاققا قارسى 76 توننا ماتەريال دايىندالدى.