الماتى وبلىسىنىڭ تۇرعىندارىنا سەل قاۋپىنە بايلانىستى ەسكەرتۋ جاسالدى

قونايەۆ. KAZINFORM - الماتى وبلىسى تالعار اۋدانىنىڭ اكىمدىگى وسى ايماقتاعى تاۋلارعا دەمالىسقا شىعۋعا تىيىم سالدى. سەبەبى تالعار وزەنىنىڭ باسسەينىندە جينالعان سۋ تاسۋى مۇمكىن.

اۋدان اكىمدىگىنىڭ مالىمەتىنە سايكەس، الماتى وبلىسىنىڭ تاۋلى اۋداندارىندا تەمپەراتۋرانىڭ جوعارىلاۋى، مۇزدىقتاردىڭ قارقىندى ەرۋى جانە مورەنالىق-مۇزدىق كولدەردىڭ تولۋى، وزەن ارنالارىندا اعىن كۇشەيىپ، سەل ءجۇرۋى مۇمكىن.

- تالعار وزەنىنىڭ باسسەينىندەگى №19 كول جانە ونىڭ سولتۇستىك جانە سولتۇستىك-شىعىس بولىگىندە جينالعان سۋ جاعالاۋدى جىرىپ اعۋى مۇمكىن. فوندىق باعالاۋ ادىستەمەسىنە سۇيەنە وتىرىپ، سەل اعىندارىن بولجاۋ بويىنشا مۇزدىق كولدىڭ سەرپىلىسى وسى جىلدىڭ 6-تامىزىنان باستالۋى ىقتيمال. وسىعان بايلانىستى تالعار اۋدانىنىڭ تۇرعىندارى، قوناقتارى جانە دەمالۋشىلار مەن تۋريستەرگە تالعار قالاسىنىڭ باسىندا ورنالاسقان گيروتەحنيكالىق قوندىرعىدان اسىپ تاۋعا، دەمالىس ورىندارىنا شىعۋعا تىيىم سالىنعان،- دەپ حابارلادى اكىمدىكتەن.

سونىمەن قاتار تالعار وزەنى ارناسىنا جاقىن ورنالاسقان تۇرعىن ءۇي يەلەرىنە جانە جەرگىلىكتى حالىققا ۇنەمى الەۋمەتتىك جەلىلەرگە، تەلەديدار جانە راديوبايلانىس جەلىلەرىنە نازار اۋدارۋ كەرەك ەكەنى ەسكەرتىلدى.