مەكەمە مالىمەتىنە سايكەس، الماتى وبلىسىندا بۇگىنگى كۇنى 1406 ونەركاسىپتىك كاسىپورىن جۇمىس ىستەيدى. ونىڭ 14 ءى ءىرى، 46 سى ورتا، قالعاندارى كىشى كاسىپورىندار.
ال الماتى وبلىسىنىڭ كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ باسشىسى قۋانىش باقىت ۇلىنىڭ ايتۋىنشا، وڭىردەگى كاسىپورىندار وندىرەتىن باستى ءونىم - سۋسىندار.
- 2023-جىلى ەڭ كوپ وندىرىلگەن ءونىم - سۋسىندار 424 ميلليارد تەڭگەگە ەڭ كوپ بولدى. بيىل قاڭتار-قىركۇيەك ايلارىندا 1000 جۇمىس ورنىن قۇرا وتىرىپ، 87,7 ميلليارد تەڭگە سوماسىنا 30 ونەركاسىپتىك جوبا ىسكە قوسىلدى، - دەدى قۋانىش باقىت ۇلى Kazinform تىلشىسىنە بەرگەن جاۋابىندا.
ەسكە سالايىق، بۇعان دەيىن الماتى قالاسىنداعى باستى ءوندىرىس سالاسى - ماشينا جاساۋ ەكەنىن جازعانبىز. جالپى الماتى قالاسىنىڭ يندۋستريالدى ايماعىندا جۇمىس ىستەيتىن كاسىپورىندار 2023-جىلى 801,3 ميلليارد تەڭگەنىڭ ءونىمىن وندىرگەن. ونىڭ ىشىندە بىلتىر 48857 كولىك قۇرالى شىعارىلعان.
سونداي-اق ەلىمىزدە 200 مىڭعا جۋىق تەحنيكا وندىرىلسە دە، ونەركاسىپ جانە قۇرىلىس ءمينيسترىنىڭ ۇيىندە قازاقستاندىق ءونىم جوق ەكەنىن جازعان ەدىك.