الماتى وبلىسىندا ستۋدەنت قىزدى قاتىگەزدىكپەن ولتىرگەن قىلمىسكەرلەر سوتتالدى

قونايەۆ. KAZINFORM - الماتى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا الدىن الا ءسوز بايلاسۋ ارقىلى ادامدار توبىمەن پايداكۇنەمدىك نيەتپەن اسا قاتىگەزدىكپەن قاساقانا كىسى ءولتىردى دەگەن ايىپتالۋشىلار ق. جانە س. -قا قاتىستى قىلمىستىق ءىس قارالدى.

سوت مالىمەتىنە سايكەس، وسى جىلدىڭ 6-ناۋرىزىندا سوتتالۋشىلار جابىرلەنۋشىمەن ورتاق تانىسى ارقىلى تانىسىپ، جابىرلەنۋشىنى ۋاقىتشا ءبىر جەرگە ورنالاستىرۋدى وتىنگەن. وسى ماقساتتا الماتى قالاسىندا پاتەر جالعا الىنعان.

ەكىنشى كۇنى قاراجاتتارى بىتۋىنە بايلانىستى جالداۋ اقىسىن ودان ءارى تولەۋ ءۇشىن، سوتتالۋشى ق. جابىرلەنۋشىگە «iPhone 13 Pro» ماركالى سمارتفونىن كوميسسيالىق دۇكەنگە تاپسىرۋعا، كەيىنىرەك ونى قايتا ساتىپ الۋعا ۋادە بەرىپ، كوندىرگەن. تۇسكەن قاراجاتتى جۇمساعاننان كەيىن سوتتالۋشىلار جابىرلەنۋشىنى بانكتەر مەن ميكروقارجى ۇيىمدارىندا جالپى سوماسى 435 مىڭ تەڭگەگە اقشالاي قارىزداردى رەسىمدەۋگە كوندىرگەن.

ال 12-ناۋرىزدا سوتتالۋشىلار جابىرلەنۋشىنىڭ سمارتفونىن كوميسسيالىق دۇكەننەن جاسىرىن ساتىپ الىپ، ونى 240 مىڭ تەڭگەگە ساتقان، ال تۇسكەن قاراجاتتى جەكە ماقساتتا پايدالانعان.

جابىرلەنۋشىنىڭ سمارتفوندى قايتا ساتىپ الۋ تۋرالى بىرنەشە تالاپتارىنان كەيىن سوتتالۋشىلاردىڭ قىلمىستىق نيەتى پايدا بولدى. وسى ماقساتتا، 15-ناۋرىز كۇنى تۇندە سوتتالۋشىلار جابىرلەنۋشىنى ۇيىنە اپارۋ سىلتاۋىمەن ونىمەن بىرگە جولعا شىعىپ، ساعات 02:00 شاماسىندا قونايەۆ- قازاقستان اۆتوجولىنىڭ 36- شاقىرىمىنا جەتىپ، جولدان شىعىپ، اشىق ۋچاسكەگە توقتاعان. سوتتالۋشىلار كەزەك-كەزەك جابىرلەنۋشىنى ساقامەن ۇرىپ سوعىپ، ونى بەنزينمەن ورتەۋگە تىرىسقان، سودان كەيىن ولار وقيعا ورنىنان قاشىپ كەتكەن. جابىرلەنۋشى العان جاراقاتتارىنان سول جەردە قايتىس بولدى.

- سوت ۇكىمىمەن ق. جانە س. وزدەرىنە تاعىلعان ءىس-ارەكەتتەردى جاساعانى ءۇشىن كىنالى دەپ تانىلىپ، ءارقايسىسىنا 17 جىلعا باس بوستاندىعىنان ايىرۋ جازاسى تاعايىندالدى، - دەپ حابارلادى وبلىستىق سوتتان.

سوت ۇكىمى زاڭدى كۇشىنە ەندى.

اۆتور
دوسبول اتاجان