الماتى وبلىسىندا ساربازدى اسپانعا وق اتىپ قارسى العاندار ۇستالدى

قونايەۆ. KAZINFORM - الماتى وبلىسىندا اسكەردەن ورالعان جىگىتتى تاپانشادان وق اتىپ قارسى الدى. ونىڭ ۆيدەوسى الەۋمەتتىك جەلىدە پايدا بولدى.

كادردان ساربازدى تۋىستارى كۇتىپ العانىن كورۋگە بولادى. ءبىر كەزدە جانىنداعى ەكى ەر ادام اسپانعا وق اتادى. الماتى وبلىستىق پوليتسيا دەپارتامەنتىنىڭ مالىمەتىنشە، بۇل جاعداي قاراساي اۋدانى كوكساي اۋىلىندا بولعان.

«الەۋمەتتىك جەلىلەردە جۇرگىزىلگەن مونيتورينگ بارىسىندا 30-ءساۋىر كۇنى قاراساي اۋدانىنىڭ كوكساي اۋىلىندا وق اتقان بۇزاقىلىق ارەكەت فاكتىسى انىقتالدى. ءتارتىپ ساقشىلارى 21 جانە 23 جاستاعى ەكى جىگىتتى ۇستاپ، اۋداندىق پوليتسيا باسقارماسىنا جەتكىزدى»، - دەپ حابارلادى دەپارتامەنتەن.

قارۋلار ءتيىستى ساراپتاماعا جولداندى.

«اتىس قارۋىن قولدانعان بۇزاقىلىق فاكتىسى بويىنشا قىلمىستىق ءىس قوزعالدى. ەكى جاس جىگىت ۋاقىتشا ۇستاۋ يزولياتورىنا قامالدى. تەرگەۋ جۇرگىزىلىپ جاتىر»، - دەپ اتاپ ءوتتى ۆەدومستۆودان.

اۆتور
الما مۇقانوۆا