الماتى وبلىسىندا ءبىر تاۋلىكتە ءۇش بارىمتاشى ۇستالدى

استانا. KAZINFORM - جامبىل اۋدانىندا پوليتسيا قىزمەتكەرلەرى 12 باس جىلقىنى ۇرلاۋ تۋرالى رەزونانستىق ءىستى اشتى.

وقيعا 8-قاراشادا اقدالا اۋىلىندا بولدى. شارۋا قوجالىعىنىڭ يەسى جالپى قۇنى 10,6 ميلليون تەڭگەنى قۇرايتىن 12 باس جىلقىنىڭ ۇرلانعانى تۋرالى ارىزداندى. پوليتسيا قىلمىستىق ءىستى تىركەپ، دەرەۋ ىزدەۋگە كىرىستى.

«جەدەل-ىزدەستىرۋ ءىس-شارالارى بارىسىندا كۇدىكتى ۇستالدى. ول بۇرىن سوتتالعان جەرگىلىكتى تۇرعىن بولىپ شىقتى. جاۋاپ الۋ كەزىندە ول ءوزىنىڭ كىناسىن تولىق مويىندادى. ەر ادام ۋاقىتشا ۇستاۋ يزولياتورىنا قامالدى. قازىرگى ۋاقىتتا ونىڭ باسقا دا وسىنداي قىلمىستارعا قاتىسى بار-جوعى تەكسەرىلىپ جاتىر»، - دەپ حابارلادى پوليتسيا.

وسىعان ۇقساس مال ۇرلىق وقيعالارى ىلە جانە ەڭبەكشىقازاق اۋداندارىندا تىركەلدى، وندا قاسكۇنەمدەر ءبىر جىلقى مەن ءىرى قارا مالدى ۇرلاپ اكەتكەن. كريمينالدىق پوليتسيا قىزمەتكەرلەرىنىڭ ۇيلەسىمدى جۇمىسىنىڭ ارقاسىندا كۇدىكتىلەر ۇستالدى. قىلمىستىق ىستەر قوزعالدى، تەرگەۋ جۇرگىزىلىپ جاتىر.

پوليتسيا مال يەلەرىنە ساقتىق شارالارىن ۇستانۋ كەرەكتىگىن ەسكەرتەدى. مال ۇرلىعى جاعدايلارىنىڭ كوپشىلىگى ءتىرى مۇلىكتى قورعاۋعا نەمقۇرايلى قاراۋعا بايلانىستى. ءتارتىپ ساقشىلارى ازاماتتاردى قاسكۇنەمدەردىڭ قۇربانى بولماس ءۇشىن مالدى ءتيىستى قاراۋسىز قالدىرماۋعا شاقىرادى.