الماتى وبلىسىندا اتىسقا ۇلاسقان جانجالدان ءبىر ادام قايتىس بولدى

قونايەۆ. KAZINFORM - الماتى وبلىسى تالعار قالاسىندا تۇنگى ۋاقىتتا توبەلەس بولىپ، سالدارىنان ءبىر ادام مەرت بولدى. پوليتسيا كىسى ءولتىرۋ فاكتىسى بويىنشا قىلمىستىق ءىس قوزعادى.

الماتى وبلىسى پوليتسيا دەپارتامەنتىنىڭ مالىمەتىنە سايكەس، تالعار قالاسىندا 4-قازانعا قاراعان ءتۇنى جاس جىگىتتەر اراسىندا جانجال تۋىنداعان. كيكىلجىڭ قارۋلى قاقتىعىسقا ۇلاسىپ، سالدارىنان ەكى جىگىت اۋداندىق اۋرۋحاناعا جەتكىزىلدى. ولاردىڭ ءبىرى العان جاراقاتىنان جانساقتاۋ بولىمىندە قايتىس بولدى.

- كىسى ءولتىرۋ فاكتىسى بويىنشا پوليتسيا قىلمىستىق ءىس قوزعادى. وقيعانىڭ بارلىق قاتىسۋشىسى ۇستالدى جانە ۋاقىتشا ۇستاۋ يزولياتورىنا قامالدى. قازىرگى ۋاقىتتا ءىستىڭ بارلىق ءمان-جايىنىڭ تولىقتىعىن، جان-جاقتىلىعىن جانە وبەكتيۆتىلىگىن قامتاماسىز ەتۋ ءۇشىن قاجەتتى تەرگەۋ ءىس-شارالارى جۇرگىزىلىپ جاتىر. قىلمىستىق ءىستى تەرگەۋ وبلىستىق پوليتسيا دەپارتامەنتى باسشىلىعىنىڭ ەرەكشە باقىلاۋىندا بولادى، - دەپ حابارلادى وبلىستىق پ د باسپا ءسوز قىزمەتى.

سونداي-اق وبلىستىق پ د تەرگەۋ مۇددەسى ءۇشىن وزگە دە اقپارات جاريالاۋعا جاتپايتىنىن ەسكەرتتى.

ەسكە سالايىق، بۇعان دەيىن الماتىدا شەتەلدىك ازاماتتىڭ ءولىمى تەكسەرىلىپ جاتقانىن جازعان ەدىك.