الماتى وبلىسىندا 8 مەكتەپ Starlink سپۋتنيكتىك ينتەرنەتىنە تەگىن قوسىلدى

 الماتى وبلىسىندا «جايلى مەكتەپ» جوباسى اياسىندا 53 مەكتەپ سالىنادى. بۇل تۋرالى الماتى وبلىسىنىڭ اكىمى مارات سۇلتانعازيەۆ ايتتى، دەپ حابارلايدى Kazinform.

«ءبىلىم بەرۋ سالاسىنداعى نەگىزگى باسىمدىق - ءۇشاۋىسىمدى وقىتۋ مەن ورىن تاپشىلىعىن جويۋ. 2023 -جىلدىڭ باسىندا وبلىستا 52 ءۇش اۋىسىمدى مەكتەپ بولدى. بيىل 14,4 مىڭ ورىنعا ارنالعان 10 مەكتەپ تاپسىرىلدى. 5 ەۋى جىلدىڭ سوڭىنا دەيىن بەرىلەدى. كەلەر جىلى ءۇش اۋىسىمدى مەكتەپتەر 39 عا دەيىن قىسقارادى. «جايلى مەكتەپ» ۇلتتىق جوباسى بويىنشا 2024-25 -جىلدارى 54,6 مىڭ ورىندىق 53 مەكتەپ سالىنادى. وسىنىڭ ناتيجەسىندە ءۇشاۋىسىمدى مەكتەپ ماسەلەسى شەشىلەدى»، - دەدى ءوڭىر اكىمى ورتالىق كوممۋنيكاتسيالار قىزمەتىندەگى بريفينگىدە.

ونىڭ اتاپ وتۋىنشە، «ءبىلىم- يننوۆاتسيا» جانە «قازاقستان حالقىنا» قورلارىمەن بىرلەسىپ، «تابىستى 50 مەكتەپ» اتتى بىرەگەي جوبانى جۇزەگە اسىرۋ ءۇشىن جەرگىلىكتى بيۋدجەتتەن 756 ميلليون تەڭگە بولىنگەن. 50 مەكتەپتىڭ 3,8 مىڭ ۇستازى بىلىكتىلىگىن ارتتىرۋ كۋرستارىنان ءوتىپ، 58 مىڭنان استام وقۋشى كەشەندى وقۋىمەن قامتىلدى. جوبا اياسىندا «قازاقستان حالقىنا» قورىنىڭ قولداۋىمەن 50 مەكتەپكە 1,5 ميلليارد تەڭگەگە فيزيكا، حيميا جانە بيولوگيا پاندەرىنىڭ 150 زەرتحانا كابينەتتەرى جابدىقتالىپ جاتىر.

«قازىرگى ۋاقىتتا وبلىس مەكتەپتەرى ينتەرنەت جەلىسىمەن تولىق قامتاماسىز ەتىلگەن. الايدا شالعاي اۋدانداردا ينتەرنەت جىلدامدىعىنىڭ ماسەلەسى بار. «Digital Bridge-2023» پيلوتتىق جوباسى اياسىندا Starlink سپۋتنيكتىك ينتەرنەتىنە شالعاي اۋدانداردىڭ 8 مەكتەبى تەگىن قوسىلدى. ناتيجەسىندە ينتەرنەت جىلدامدىعى 8 مبيت/سەكۋدتان 200 گە دەيىن ارتتى. «قولجەتىمدى ينتەرنەت» باعدارلاماسىنىڭ اياسىندا وسى تەحنولوگيامەن تاعى دا 65 مەكتەپتەگى ينتەرنەتتىڭ جىلدامدىعى ارتتىرىلادى»، - دەدى وبلىس اكىمى.