وبلىستىق جەر قاتىناستارى باسقارماسىنان ءمالىم ەتكەندەي، جىل باسىنان بەرى جالپى الاڭى 50083 گەكتار بولاتىن، 446 جەر ۋچاسكەسىنىڭ پايدالانىلماي جاتقانى انىقتالدى.
- قازىر 8214 گەكتار بولاتىن 71 جەر ۋچاسكەسى بويىنشا ماتەريالدار جەر رەسۋرستارىن باسقارۋ دەپارتامەنتىنە جولدانىپ، جۇمىسقا قابىلداندى. سونىمەن قاتار 23747 گەكتار اۋماقتاعى 37 جەر ۋچاسكەسى بويىنشا تالاپ-ارىزدار سوت قاراۋىندا، ال جالپى كولەمى 2486,0 گەكتار بولاتىن ۋچاسكە بويىنشا سوت شەشىمى شىعىپ، مەملەكەت مەنشىگىنە قايتارىلدى، - دەپ حابارلادى باسقارمادان.
جىل باسىنان بەرى ەرىكتى تۇردە مەملەكەت مەنشىگىنە 14481,32 گەكتار جەر قايتارىلدى. ەڭ كوپ قايتارىلعان اۋماقتار جامبىل (3119,0 گ ا)، بالقاش (7961,87 گ ا) جانە كەگەن (1893,0 گ ا) اۋداندارىنا تيەسىلى. جالپى العاندا، 2025 -جىلدىڭ باسىنان بەرى مەملەكەت مەنشىگىنە قايتارىلعان جەر كولەمى - 16967 گەكتار.
- سونىمەن قاتار جالعا الۋ شارتتارىنىڭ ورىندالۋىنا باقىلاۋ كۇشەيتىلدى. جالپى كولەمى 30827,87 گەكتار جەردى پايدالانىپ وتىرعان 216 ادامعا شارت تالاپتارىن بۇزعانى ءۇشىن ەسكەرتۋ جىبەرىلدى. تالاپتار ورىندالماعان جاعدايدا ماتەريالدار سوت ورگاندارىنا جولدانادى، - دەپ اتاپ ءوتتى ۆەدومستۆودان.
بۇعان دەيىن الماتى وبلىسى 90 مىڭ گەكتار جەردى مەملەكەت مەنشىگىنە قايتاراتىنى تۋرالى جازعان ەدىك.
اۆتور
الما مۇقانوۆا