الماتى تاۋلارىندا قىز قازا تاپتى: بۇل جايت تۋرالى نە بەلگىلى؟

استانا. KAZINFORM - الماتى ماڭىنداعى تاۋدا بولعان قايعىلى وقيعاعا قاتىستى جاڭا مالىمەت شىقتى.

2-مامىردا المااراسان شاتقالىندا تاس قۇلاپ، سالدارىنان قىز قازا تاپقان بولۋى مۇمكىن دەگەن اقپارات تاراعان ەدى. الايدا توتەنشە جاعدايلار مينيسترلىگىنىڭ رەسپۋبليكالىق جەدەل قۇتقارۋ جاساعى مالىمەتىنشە، قايعىلى جاعداي 4-مامىردا گورەلنيك سارقىراماسى ماڭىندا بولعان. بۇل وقيعانىڭ ەكى كۇن بۇرىنعى تاس قۇلاعان وقيعاعا قاتىسى جوق. رەسمي مالىمەتكە سايكەس ول كەزدە ەشكىم زارداپ شەكپەگەن.

«4-مامىردا تەڭىز دەڭگەيىنەن 2,5 مىڭ مەتر بيىكتە، گورەلنيك شاتقالىنداعى سارقىراما ماڭىندا قۇتقارۋشىلار، مەديتسينا قىزمەتكەرلەرى، كينولوگتار بىرلەسىپ، قىزدىڭ دەنەسىن تاپتى. ءمايىت پوليتسيا قىزمەتكەرلەرىنە تاپسىرىلدى»، - دەپ جازىلعان ۆەدومستۆو حابارلاماسىندا.

قىز ناقتى نەدەن قازا تاپقانى ازىرگە بەلگىسىز. الەۋمەتتىك جەلىلەردە وقيعانىڭ كۋاگەرلەرى قىزدىڭ ۇستىنە ۇلكەن تاس قۇلاعان بولۋى مۇمكىن ەكەنىن جازىپ جاتىر.

قۇتقارۋشىلاردىڭ مالىمەتىنشە، جىل باسىنان بەرى الماتى تاۋلارىندا 80 نەن اسا قۇتقارۋ وپەراتسياسى جۇرگىزىلگەن. 100 دەن اسا تۋريست، سونىڭ ىشىندە 20 بالا قۇتقارىلعان.