الماتى ستانسياسىنان «جىبەك جولى» تۋريستىك پويىزى ساپارىن باستادى

استانا. KAZINFORM - بۇگىن الماتى ستانسياسىنان «جىبەك جولى» تۋريستىك پويىزى 5 كۇندىك ساپارعا شىقتى. ۇلتتىق تاسىمالداۋشى ىسكە قوسقان بۇل پويىز «الماتى- تۇركىستان- تاشكەنت- الماتى» باعىتى بويىنشا جۇرەدى.

تۋر 16-20-قاراشا ارالىعىندا 5 كۇنگە سوزىلادى. العاشقى ساپارعا 115 جولاۋشى اتتاندى.

«بۇل جوبا مەملەكەت باسشىسىنىڭ ءتۋريزمدى دامىتۋ جونىندەگى تاپسىرماسىنا سايكەس «قازاقستان تەمىر جولى» ۇلتتىق كومپانياسىنىڭ ۇيىمداستىرۋىمەن جۇزەگە اسىرىلدى. جوبانى دامىتۋعا قر كولىك مينيسترلىگى، تۋريزم جانە سپورت مينيسترلىگى، الماتى قالاسى مەن تۇركىستان وبلىسىنىڭ اكىمدىكتەرى، سونداي- اق، «وزبەكستان تەمىر جولدارى» كومپانياسى سەرىكتەس رەتىندە ۇلەس قوستى»، - دەپ اتاپ ءوتتى «جولاۋشىلار تاسىمالى» ا ق باس ديرەكتورىنىڭ ورىنباسارى مۇحيت تۇرسىنبايەۆ.

تۋريستەر تۇركىستاندا ءبىر كۇن، تاشكەنتتە ەكى كۇن وتكىزەدى. باعدارلاما بارىسىندا ولار وسى قالالاردىڭ كورىكتى جەرلەرىن، اسەم تابيعات ايماقتارىن جانە قاسيەتتى ورىندارىن ارالايدى.

بارلىق ەكسكۋرسيا كاسىبي گيدتەردىڭ سۇيەمەلدەۋىمەن وتەدى. ال مارشرۋت بويىنداعى قوزعالىس تۋريستىك اۆتوبۋستار ارقىلى ۇيىمداستىرىلادى.

پويىز قۇرامىنا قازاقستاندا شىعارىلعان، بۇرىن باسقا باعىتتاردا قولدانىلماعان 5 جاڭا ۆاگون قوسىلعان. قىزمەت كورسەتۋ توبىنا پويىز باستىعى، سەگىز جولسەرىك جانە ءبىر ەلەكترومەحانيك كىرەدى.

پويىزدىڭ سىرتى مەملەكەتتىك تۋدىڭ بەينەسىمەن بەزەندىرىلسە، ىشكى ءبولىمى ۇلتتىق ورنەكتەرمەن اشەكەيلەنگەن التىن ءتۇستى توسەك- ورىندارمەن جابدىقتالعان. ۆاگون-مەيرامحانا ءداستۇرلى ستيلدە بەزەندىرىلىپ، ۇلتتىق جانە ەۋروپالىق تاعامداردى قامتيتىن ءمازىردى ۇسىنادى.

ايتا كەتەيىك، تۋريستىك پويىز بيلەتتەرى تۋريستىك اگەنتتىكتەر ارقىلى ساتىلعان.