الماتى مۋزەيىندە وزبەكالى جانىبەكوۆكە كورمە اشىلدى
الماتى. KAZINFORM - حالىقارالىق مۋزەيلەر كۇنى اياسىندا كورنەكتى مەملەكەت جانە قوعام قايراتكەرى، ەتنوگراف-عالىم وزبەكالى جانىبەكوۆتىڭ ءومىرى مەن قىزمەتىنە ارنالعان «مادەني مايدان» كورمەسى الماتى مۋزەيىندە اشىلدى.
كورمەدە قوعام قايراتكەرىنىڭ وتباسىنان الىنعان فوتولار، ارحيۆتىك قۇجاتتار، ەڭبەكتەرى مەن ماراپاتتارى، كيىمدەرى، جەكە زاتتارى، قولجازبالارى، ەسكيزدەرى قويىلدى. سونداي-اق الماتى مۋزەيى قورىنان وزبەكالى جانىبەكوۆتىڭ ۇلگىسى بويىنشا تىگىلگەن «سازگەن سازى» انسامبلىنىڭ العاشقى ورىنداۋشىسىنىڭ ساحنالىق كيىمى، فوتوسۋرەتتەرى، مۋزىكالىق اسپاپتارى مەن ازىرەت سۇلتان مەملەكەتتىك تاريحي-مادەني مۋزەي قورىعىنىڭ قورىنان الىنعان جەكە زاتتارى ۇسىنىلدى.
«كورمە كاسىبي مەرەكەمىز - حالىقارالىق مۇراجايلار كۇنىنە وراي ۇيىمداستىرىلدى. كورمەگە وزبەكالى جانىبەكوۆتىڭ ءوزى قولدانعان 100 دەن استام زاتتارى قويىلدى. وعان قوسا ءبىز كورمەدە وزبەكالى جانىبەكوۆتىڭ مۋزەيلەردى قۇرۋداعى ەڭبەگىن ايىرىقشا كورسەتۋگە تىرىستىق. سەبەبى وزبەكالى جانىبەكوۆ 1971-1991 -جىلداردىڭ ارالىعىندا ەلىمىزدە 40 مۋزەيدىڭ اشىلۋىنا ۇلەس قوسقان. ول مۇراجايلار بۇگىنگى كۇنگە دەيىن جۇمىس ىستەپ تۇر. كورمە ەكى اپتا بويى بولادى، كىرۋ تەگىن»، - دەدى الماتى قالاسى مۋزەيلەر بىرلەستىگىنىڭ ديرەكتورى ءلاززات ساعىندىقوۆا.
ايتا كەتكەن ءجون، وزبەكالى جانىبەكوۆ - قازاق حالقىنىڭ ۇلتتىق مادەنيەتى مەن ونەرىن دامىتۋ جولىندا ىرگەلى ىستەر اتقارعان، سالت-ءداستۇردىڭ، تاريحي جادىگەرلەردىڭ قايتا جاندانۋىنا ىقپال ەتكەن ۇلت جاناشىرى. ونىڭ باستاماسىمەن قازاقستاندا جۇزگە جۋىق مۋزەي مەن ەتنوگرافيالىق زالدار اشىلىپ، «سازگەن سازى»، «شەرتەر»، «ادىرنا»، «التىناي» فولكلورلىق-ەتنوگرافيالىق ءان-بي انسامبلدەرى، تەاترلار، «كازرەستاۆراتسيا»، «بىرەگەي ىسقىمەن وينالاتىن مۋزىكالىق اسپاپتاردىڭ مەملەكەتتىك كوللەكتسياسى» قۇرىلدى.
سونىمەن قاتار ونىڭ ارقاسىندا ۇلى دالانىڭ ءبىرقاتار ەسكەرتكىشتەرى ساقتالدى. قالپىنا كەلتىرىلگەن ەسكەرتكىشتەردىڭ قاتارىندا قوجا احمەت ياسساۋي، تاجىك، قاراحان، ايشا-ءبيبى، اق-ۇيىق جانە بابادجا-حاتۋن كەسەنەلەرى مەن جاركەنت مەشىتى جانە وتىرار ارحەولوگيالىق ەسكەرتكىشتەرى بار. وزبەكالى جانىبەكوۆتىڭ تىكەلەي ىقپالىمەن قازاقتىڭ ءتول مەيرامى ناۋرىز قايتا جاندانىپ، قاسيەتتى تايقازان قازاقستانعا قايتارىلدى.
اۆتور
دوسبول اتاجان