الماتى ماڭىندا وق اتقاندار ۇستالدى

الماتى. KAZINFORM - الماتى وبلىسىندا توي كەزىندە اسپانعا مىلتىق اتقان كۇدىكتىلەر قولعا ءتۇستى. بۇل تۋرالى وبلىستىق پوليتسيا دەپارتامەنتى حابارلادى.

پوليتسيا مالىمەتىنە سايكەس، وقيعا 9-ماۋسىم كۇنى الماتى وبلىسى ەڭبەكشىقازاق اۋدانى تۇرگەن اۋىلىندا بولعان.

- جەدەل- ىزدەستىرۋ ءىس-شارالارىنىڭ بارىسىندا وبلىستىق ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى مەن جىلدام قيمىلدايتىن ارنايى جاساقتىڭ جاۋىنگەرلەرى قۇقىقبۇزۋشىلاردى قولعا ءتۇسىرىپ، ۋاقىتشا ۇستاۋ يزولياتورىنا قامادى. اتىس قارۋىن قولدانۋ بۇزاقىلىق فاكتىسى بويىنشا پوليتسيامەن قىلمىستىق ءىس قوزعالدى. قارۋلار ءتيىستى ساراپتاماعا جولداندى. تەرگەۋ بارىسى مەنىڭ جەكە باقىلاۋىمدا، - دەدى الماتى وبلىسى پ د باستىعى باۋرجان الەنوۆ.

سونداي-اق پوليتسيا باستىعى اۋداندىق پوليتسيا باسشىلىعىنا قاتىستى قاتاڭ شارالار قابىلدانعانىن اتاپ ءوتتى.

ەسكە سالا كەتەيىك، بۇعان دەيىن الماتى ماڭىنداعى تويدا مىلتىق اتقاندار ىزدەستىرىلىپ جاتقانىن جازعان ەدىك.

اۆتور
دوسبول اتاجان