الماتى-دۋباي اۋە رەيسىندە قوعامدىق ءتارتىپتى بۇزعان ەكى رەسەيلىك جاۋاپقا تارتىلدى
استانا. KAZINFORM - الماتى - دۋباي باعىتىنداعى اۋە رەيسىنە باعىت العان شەتەلدىك قوس جولاۋشى ۇشپاي قالدى. ولار قوعامدىق ءتارتىپتى بۇزعانى ءۇشىن جاۋاپقا تارتىلدى.
«الماتى قالاسى اۋەجايىنداعى جەلىلىك پوليتسيا ءبولىمىنىڭ قىزمەتكەرلەرى اكت بويىنشا الماتى - دۋباي باعىتىنداعى اۋە رەيسىنەن ەكى جولاۋشىنى ءتۇسىرىپ الدى. پوليتسەيلەر تەكسەرۋ كەزىندە 24 جانە 25 جاستاعى رەسەي فەدەراتسياسىنىڭ ەكى ازاماتشاسىن انىقتادى. ولار ۇشاققا وتىرعىزۋ كەزىندە ماساڭ كۇيدە بولىپ، قوعامدىق ءتارتىپتى بۇزعان»، - دەلىنگەن حابارلامادا.
مەديتسينالىق كۋالاندىرۋ قورىتىندىسىنا سايكەس، ۇستالعان ازاماتشالاردا ورتاشا دارەجەلى الكوگولدىك ماساڭدىق انىقتالدى. قۇقىق بۇزۋشىلار الكوگولدىك ىشىمدىكتەردى ىشكەنى نەمەسە قوعامدىق ورىندارعا ماساڭ كۇيىندە كەلگەنى ءۇشىن جاۋاپكەرشىلىككە تارتىلىپ، ءارقايسىسىنا 5 ا ە ك مولشەرىندە ايىپپۇل سالىندى.
ەستەرىڭىزگە سالا كەتەيىك، وسى جىلدىڭ باسىنان بەرى كولىك پوليتسەيلەرى ءتۇرلى اكىمشىلىك قۇقىق بۇزۋشىلىقتار جاساعانى ءۇشىن 30871 ازاماتتى اكىمشىلىك جاۋاپكەرشىلىككە تارتتى، ونىڭ ىشىندە الكوگولدىك ىشىمدىكتەر ىشكەنى نەمەسە قوعامدىق ورىندارعا ماساڭ كۇيىندە كەلگەنى ءۇشىن - 2339.
اۆتور
باقىتگۇل اباي قىزى