الماتى-بىشكەك جولىندا اۆتوكولىك تراكتورعا سوقتىعىسىپ، 6 ادام مەرت بولدى
الماتى. KAZINFORM - الماتى-بىشكەك اۆتوجولىنىڭ 81-شاقىرىمىندا جول اپاتى بولدى.
الماتى وبلىسى پوليتسيا دەپارتامەنتىنىڭ مالىمەتىنشە، Toyota Alphard اۆتوكولىگى جولدا جوندەۋ جۇمىستارىن جۇرگىزىپ جاتقان جول- پايدالانۋ قىزمەتىنىڭ تراكتورىنا سوقتىعىسقان. جول-كولىك وقيعاسى سالدارىنان جەڭىل كولىكتىڭ 5 جولاۋشىسى مەن جول قىزمەتىنىڭ ءبىر قىزمەتكەرى وقيعا ورنىندا كوز جۇمدى. جۇرگىزۋشى مەن تاعى ءبىر جولاۋشى ءتۇرلى جاراقاتتارمەن مەديتسينالىق مەكەمەگە جەتكىزىلگەن.
وبلىس پوليتسياسى جول اپاتىنا بايلانىستى قىلمىستىق ءىس قوزعادى.
- قازىرگى ۋاقىتتا اتالعان دەرەك بويىنشا جان-جاقتى تەرگەۋ جۇمىستارى جۇرگىزىلىپ جاتىر. وقيعانىڭ بارلىق ءمان-جايى انىقتالىپ جاتىر، - دەپ حابارلادى دەپارتامەنتتەن.
ەسكە سالايىق، بۇعان دەيىن الماتىدا موتوسيكل قاعىپ، ەكى جول جۇمىسشىسى مەرت بولعانىن جازعانبىز.
اۆتور
دوسبول اتاجان