الماتى بيۋدجەتى 30 پايىزعا ءوستى

الماتى. KAZINFORM - الماتىدا جىل باسىنان بەرى جەرگىلىكتى بيۋدجەت كىرىسى %30 عا ءوستى. بۇل تۋرالى قالالىق قارجى باسقارماسى ءمالىم ەتتى.

جەرگىلىكتى بيۋدجەتكە 33,5 پايىز وسىممەن 719,7 ميلليارد تەڭگە كىرىس ءتۇستى. بۇل شاعىن جانە ورتا بيزنەس ءوسىمى ەسەبىنەن كورپوراتيۆتىك سالىقتىڭ 49,4 پايىزعا ۇلعايۋىنا بايلانىستى. سونداي-اق، الەۋمەتتىك سالىق بويىنشا تۇسىمدەردىڭ 52 پايىزعا ءوسۋى قامتاماسىز ەتىلدى.

قارجى باسقارماسى اتاپ وتكەندەي، الماتىنىڭ مەملەكەتتىك بيۋدجەتكە قوسقان ۇلەسى 28,6 پايىز بولدى. 2024 -جىلعى ناۋرىزدا قالا بيۋدجەتى 103,6 ميلليارد تەڭگەگە 1 تريلليون 726,2 ميلليارد تەڭگەگە دەيىن ۇلعايتىلدى.

2023 -جىلى قالا ەكونوميكاسى 10,1 پايىزعا ءوسىپ، 24,8 تريلليون تەڭگەگە جەتتى. بۇل كەيىنگى 10 جىلداعى رەكوردتىق كورسەتكىش.

«ەكونوميكانىڭ قارقىندى دامۋى جۇمىسسىزدىق دەڭگەيىن 2022 -جىلعى 5,0 پايىزدان 2023 -جىلى 4,8 پايىزعا دەيىن تومەندەتۋگە مۇمكىندىك بەردى. جالپى، الماتى قالاسىنىڭ قازاقستاننىڭ جالپى ىشكى ونىمىندەگى ۇلەسى 20,6 پايىزعا دەيىن ءوستى»، - دەپ اتاپ ءوتتى الماتى قالاسى اكىمدىگىنەن.

اۆتور

الما مۇقانوۆا