الماتى اگلومەراتسياسىن باسقارۋ جۇيەسى قايتا قارالۋى مۇمكىن

قونايەۆ. KAZINFORM - الماتى اگلومەراتسياسىن دامىتۋ جۇمىستارىن تەك ساۋلەت جانە قالا قۇرىلىسى باسقارماسىنا جۇكتەۋ جەتكىلىكسىز. بۇل تۋرالى «AMANAT» پارتياسىنىڭ الماتى وبلىستىق فيليالى جانىنداعى «وڭىرلىك دامۋ» جونىندەگى كەڭەس وتىرىسىندا ايتىلدى.

كەڭەس ءتوراعاسى ماحاببات بيگەلديەۆتىڭ سوزىنشە، قازىر الماتى ماڭىنداعى ەلدى مەكەندەردە حالىق سانى ارتىپ، جاڭا قۇرىلىس بەلسەندى ءجۇرىپ جاتىر. الايدا بۇل اۋماقتاردا جول، سۋ، جارىق، ينتەرنەت، مەكتەپ، ەمحانا، قوعامدىق كولىك سەكىلدى ومىرلىك ماڭىزى بار ينفراقۇرىلىمدار قاجەتتى دەڭگەيدە دامىماي كەلەدى. ماسەلەنى تەك جوسپارلاۋ نەمەسە قۇرىلىس سالاسىمەن شەشۋ مۇمكىن بولماي وتىر.

- ءبىز اگلومەراتسيا ماسەلەسىن تەك قۇرىلىس پەن باس جوسپار شەڭبەرىندە قاراپ كەلەمىز. ءبىراق بۇل - جۇيەلى ءارى سالاارالىق سيپاتتاعى جۇمىس. مۇندا دەنساۋلىق ساقتاۋ، ءبىلىم بەرۋ، ينجەنەرلىك ينفراقۇرىلىم، كولىك، بايلانىس سياقتى ءتۇرلى باسقارمالاردىڭ مىندەتتەرى قيىلىسادى. سوندىقتان بۇل جۇمىستى ۇيلەستىرەتىن ناقتى ورگان قاجەت، - دەدى كەڭەس ءتوراعاسى.

وسىعان بايلانىستى، كەڭەس مۇشەلەرى اگلومەراتسيالىق جوبالاردى ۇيلەستىرەتىن جاۋاپتى قۇرىلىم رەتىندە الماتى وبلىسىنىڭ ەكونوميكا جانە بيۋدجەتتىك جوسپارلاۋ باسقارماسىن قاراستىرۋدى ۇسىندى. بۇل باسقارما ءتۇرلى سالاداعى باسقارمالارمەن جۇمىس ىستەپ، قاجەتتى دەرەكتەردى جيناقتاپ، قارجىلاندىرۋدى جوسپارلاۋ جانە ىسكە اسىرۋ تەتىكتەرىن ءبىر ارناعا توعىستىرا الادى.

ۇسىنىستى كەڭەس مۇشەلەرى قولداپ، بۇل ماسەلەنى وبلىس اكىمدىگى دەڭگەيىندە قاراۋ قاجەت ەكەنىن جەتكىزدى.

رەسمي دەرەككە سايكەس، الماتى اگلومەراتسياسىنىڭ قۇرامىنا الماتى قالاسىمەن قاتار، قونايەۆ قالاسى، تالعار، ىلە، قاراساي جانە جامبىل اۋداندارى كىرەدى. بارلىعى - 31 اۋىلدىق وكرۋگ پەن 98 ەلدى مەكەن. حالىق سانى 3,4 ميلليوننان اسادى.

- 2024- 2028 -جىلدارعا ارنالعان كەشەندى دامۋ جوسپارى اياسىندا الماتى اگلومەراتسياسىندا جالپى قۇنى 3,37 تريلليون تەڭگەنى قۇرايتىن 134 جوبا جۇزەگە اسىرىلماق. ونىڭ 78 ى - الماتى وبلىسى اۋماعىندا. بۇل - ينجەنەرلىك جانە الەۋمەتتىك ينفراقۇرىلىمدى جاڭارتۋدان باستاپ، كولىك، ەكولوگيا، ەنەرگەتيكا جانە سيفرلىق ينفراقۇرىلىمعا دەيىنگى اۋقىمدى شارالاردى قامتيتىن كەشەن، - دەدى ول.

كەڭەس مۇشەلەرى، مۇنداي كولەمدەگى جوبالاردى ءساتتى ورىنداۋ ءۇشىن سالاارالىق ۇيلەستىرۋ كۇشەيتىلۋى ءتيىس ەكەنىن جەتكىزدى. ايتپەسە، جەرگىلىكتى دەڭگەيدە باستالعان جۇمىستار ءبىر-بىرىمەن بايلانىسپاي، كەشىگۋلەر مەن جۇيەسىزدىككە ۇرىنۋى مۇمكىن.

ەسكە سالايىق، بۇعان دەيىن الماتى وبلىسىنداعى ەسىك قالاسىنىڭ شەكاراسى ەكى ەسە ۇلعايعانىن جازعانبىز.

سونداي-اق ماماندار الماتى قالاسىنا الداعى جىلدارى الماتى وبلىسىنان جاڭا اۋماقتى قوسۋ جوسپاردا جوق ەكەنىن اتقان بولاتىن.