الماتى اۋەجايىنداعى رەيس داۋعا ۇلاستى: جولاۋشىلار بورتتان ءتۇسىرىلدى

الماتى. قازاقپارات - 1-ماۋسىم كۇنى FlyArystan اۋە كومپانياسىنىڭ الماتى - شىمكەنت باعىتىنداعى رەيسى كەشىگىپ، جانجالمەن اياقتالدى، دەپ جازدى Kazinform اگەنتتىگىنىڭ مەنشىكتى ءتىلشىسى.

كومپانيانىڭ مالىمەتىنشە، الماتى اۋەجايىنداعى جوعارى جۇكتەمەگە بايلانىستى بىرنەشە رەيس كەيىنگە شەگەرىلگەن. سونىڭ ىشىندە №7107 رەيستى ورىنداۋعا دايىن تۇرعان ۇشاققا قوسىمشا جانارماي قۇيۋ قاجەت بولدى.

الايدا رەيستىڭ ۇشپاي ۇزاق تۇرۋىنا جولاۋشىلاردىڭ ءبىرى سەبەپ بولعان. كومپانيانىڭ باسپا ءسوز قىزمەتى مالىمدەگەندەي، ول ازامات ساپاردان باس تارتىپ، ءوزىن دەسترۋكتيۆتى تۇردە ۇستاعان. ناتيجەسىندە ۇشاق ەكى ساعاتتان استام كىدىرىپ، بارلىق جولاۋشىلار بورتتان شىعارىلىپ، قاۋىپسىزدىك شارالارى قايتا وتكىزىلگەن.

- اۆياتسيالىق قاۋىپسىزدىك تالاپتارىنا سايكەس، جولاۋشىلاردىڭ بارلىعى ۇشاقتان ءتۇسىرىلدى، سودان كەيىن اۋە كەمەسىنە تولىق تەكسەرۋ جۇرگىزىلدى. كۇتىپ تۇرعان جولاۋشىلارعا سۋ جانە تاماق ۆاۋچەرلەرى ۇسىنىلدى. FlyArystan كومپانياسى ءۇشىن قاۋىپسىزدىك - باستى باسىمدىق. بارلىق بەلگىلەنگەن ەرەجەلەر قاتاڭ ساقتالادى، - دەلىنگەن رەسمي حابارلامادا.

رەيس اقىرى شامامەن ساعات 18:00 دە ۇشتى.

بۇعان دەيىن الەۋمەتتىك جەلىدە وقيعانىڭ كۋاگەرلەرى بورتتاعى ۇزاق كۇتۋدەن كەيىن جانجال تۋىنداپ، كەيبىر جولاۋشىلاردىڭ پوليتسيا بولىمىنە جەتكىزىلگەنىن حابارلاعان بولاتىن.